SUPERBALITA CEBU

Ruiz: contact tracing sa Mandaue huyang

NAKITA ni Mandaue City Councilor Nerissa Soon-Ruiz nga huyang ang contact tracing sa dakbayan sa Mandaue.

Sa usa ka interbyu, si Ruiz miingon nga gikan sa 3Ts o testing, tracing ug treatment, ang dakbayan hinay ang pagsubay sa mga indibiduwal nga adunay kontak sa pasyente sa Covid-19.

Nagkaestoryahanay na sila ni Atty. Jamaal Calipayan, city administrator sa Mandaue City Hall, bahin sa iyang kahadlok sa kahuyang sa contact tracing sa dakbayan.

Aron mapalig-on ang pagsubay sa kontak sa siyudad, gisultian si Ruiz nga ang siyudad nagplano nga mang-hire og dugang contact tracers.

Apan kinahanglan pa nga mag-imbentaryo ang dakbayan sa contact tracers nga anaa sa matag barangay.

Isip tagdumala sa Committee on Health, siya miingon nga ang dakbayan wala’y problema sa testing tungod kay ang mga resulta mogawas na sulod lang sa tulo hangtod upat ka adlaw dili sama sa una nga pito hangtod napulo ka adlaw.

Sama sab alang sa treatment, masaligon si Ruiz nga ang mga ospital adunay igo nga gamit nga makatubag sa mga panginahanglanon sa pasyente ug anaa sab ang isolation center sa dakbayan nga moabag sa mga ospital.

Nakita ra niya ang contact tracing ang mas huyang nga parte sa pakigkombati sa dakbayan sa Covid-19.

Gisultihan niya ang SunStar Cebu nga wala pa siyay ideya kon pila ang ilang i-hire nga contact tracers.

Ang pagkahuyang sa contact tracing tungod kay way igong tawo alang sa maong trabaho.

Sagad sa mopahigayon sa contact tracing ang mga Barangay Health Emergency Response Team (BHERTs) nga mao sab ang mangunay sa pag-disinfect, pag-monitor sa mga pasyente, paghatod og lockdown kits ug uban pa.

Dugang niya nga pag-anhi ni Baguio City Mayor Benjamin Magalong sa Sugbo aron paghatag og seminar sa local government units, dako og ikatabang sa Mandaue.

Masaligon si Ruiz nga tungod kay kanhi pangulo sa Criminal Investigation and Detection Group (CIDG) si Magalong, makatabang kini sa problema sa contact tracing sa dakabayan. (KFD)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph