MOABOT sa 126 ka pamilya ang makadawat sa financial assistance sa Special Amelioration Program (SAP) karon, Hulyo 13, sa Barangay Guadalupe, siyudad sa Sugbo.
Matod ni Guadalupe Barangay Captain Michael Gacasan nga nahinabi sa Superbalita Cebu, nga mao kini ang unang batch sa mga pamilya nga modawat sa cash assistance nga P6 mil gikan sa SAP nga ihatag sa taga Department of Social Welfare and Development (DSWD).
Kining 126 ka mga benepisyaryo sa SAP sa Guadalupe mao ang nahabilin sa 300 ka mga pamilya nga wala pa makadawat sa miagi nga pag-apud-apod apan naka-fill-up na og form sa DSWD niadtong laing hugna sa pagpanghatag.
“Mao ni ang mga na-left out sa miaging pagpanghatag ug karon sila ang unang batch nato sa cash distribution uban ang atong taga DSWD,” dugang ni Gacasan.
Ang nahabilin sa 300 nga wala maapil sa unang batch nga maoy hatagan karon magpaabot lang sa ikaduhang hugna tungod kay mopahibawo ra ang taga DSWD kanila, dason sa kapitan.
Si Gacasan niingon nga iya nang gimanduan ang iyang mga sakop sa pagpahibawo ngadto na sa mga taga Guadalupe nga ipahibalo daan ang kadtong anaa sa listahan nga moanhi sa covered court aron dili magkayagaw.
Nipasabot si Gacasan ngadto na sa iyang mga residente nga magpaabot lang sa ilang pahibalo kadtong nahabilin sa 300 ka benepisyaryo nga wala maapil sa unang hugna sa ilang skedyul kon kanus-a ipanghatag sa taga DSWD aron dili magdasok ug mapatuman ang social distancing. (BBT)