SUPERBALITA CEBU

Tanod patay sa 'kalibanga'; konsehal namatay sa 'Covid-19'

USA ka 50 anyos nga barangay tanod sa Barangay Poblacion sa dakbayan sa Talisay ang namatay niadtong Biyernes, Hulyo 10, pipila ka oras human gidala sa Talisay District Hospital (TDH).

Si Poblacion Barangay Captain Edward Alesna nga nahinabi sa Superbalita Cebu niingon nga ang iyang tanod nga namatay mao si Ernesto Royo Jr., 50, sakop sa Barangay Health Emergency Response Team (BHERT) sa ilang barangay.

Matod ni Alesna, si Royo nahibaloan nila nga upat na diay ka adlaw nga gikalibanga hangtud niadtong adlaw nga Biyernes gidala na sa balay tambalanan ug pipila lang ka oras ang milabay, namatay human makasinati sa paglisod og ginhawa.

“Gi-rapid dayon to siya Sir unya negative man ang iyang resulta. Sa pagkamatay niya gi-swab dayon siya kay mao man ang sulti sa doktor pero wala pako kabalo sa resulta sa iyang swab,” matod ni Alesna.

Dugang niya nunot na sa maong panghitabo ang barangay hall sa Barangay Poblacion gipaubos dayon niini sa pag-lockdown ug gi-disinfect ang tibuok barangay.

Gipasabot ni Alesna nga ang namatay nga tanod kanunay mag-duty sa barangay ug maoy nag-monitor sa mga residente sa Poblacion nga gipaubos sa quarantine hinungdan nga angayan nga una ipaubos sa lockdown ang barangay.

Samtang 20 ka mga barangay tanod nga maoy kanunay uban ni Royo dihang mi-duty pa kini ug 20 ka BHW’s lakip na si Alesna ug unom ka mga staff sa barangay ang anaa karon sa isolation center lakip na ang unom ka mga sakop sa pamilya ni Royo ang gipaubos usab sa quarantine.

Gipahibawo ni Alesna nga wala transaksiyon una sa barangay samtang kini anaa pa sa lockdown hangtud nga dili pa mogawas ang resulta sa ilang swab tests.

“Akong selpon sir kanunay mani nga abli kon dunay manawag nga kinahanglan gyud nga aksiyonan ako lang sang ihatag sa kon kinsa to nga concern nga opisina aron mahatagan og pagtagad,” matod sa kapitan.

Dugang niya nga iya nang gipahibalo ang Talisay City Police Station sa ilang sitwasyon ug sila una ang motubag kon dunay panghitabo sa iyang barangay samtang ang City Disaster Risk Reduction and Management Office na usab ang molihok una kalabot na sa Covid-19 samtang sila anaa pa sa isolation.

Sa laing bahin, usa usab ka sakop sa Sangguniang Barangay sa Barangay Dumlog sa Talisay ang namatay sa samang adlaw sa pagkamatay sa tanod.

Si Dumlog Barangay Captain Nelson Abellana miingon nga si Konsehal Hob Dela Cuesta, 70 anyos ang namatay sa Vicente Sotto Memorial Medical Center.

Dugang ni Abellana nga si Dela Cuesta usa ka semana nga na-admit sa TCDH apan tungod sa misamot nga nag luya ang iyang lawas giabisohan ang kabanay sa konsehal nga dal-on sa VSMMC tungod sa dili na ganahan mokaon.

Si Dela Cuesta usa na ka buwan nga naglubog sa ilang panimalay tungod sa sakit nga pneumonia sa wala pa nadala sa balay tambalanan, hinungdan nga wala na kini maka-duty sa barangay.

“Mao to ang miabot sa ako nga Covid ang resulta sa iyang kamatayon. But akong paaboton gyud ang confirmation sa among Talisay City Health kay sila man ang allowed niana nga mopahibawo,” matod ni Abellana.

Tungod sa kamatayon ni Dela Cuesta ang tulo nga nahibilin sa ilang balay nga pamilya ang gidid-an una sa pagpagawas human nga gipaubos sa kwarentina.

“Akong gipabutangan didto og tanod aron naa moabag sa mga nabilin ni konsehal ug amo usab gi suportahan sa ginagmay labi na sa ilang pagkaon,” pahibalo ni Abellana.

Samtang si Abellana dili una makasulti sa pagkakaron kon kinsa ang posibleng mohulip sa namatay nga konsehal sanglit bag-o palang kini namatay. Ang Barangay Dumlog sa kasamtangan dunay usa ka positibo sa Covid-19 ug duha ka persons under investigation nga ilang gi-monitor sa pagkakaron nga anaa sa ilang BIC.

DOKTORA

Nakugang ang usa ka babaye nga doktor nga residente sa Barangay Guadalupe, siyudad sa Sugbo dihang gipahibalo nga gisubay ang mga pangan niini kadtong nagpositibo sa Covid-19.

Kini matod ni Guadalupe Barangay Councilor Apol Enriquez kinsa maoy chairwoman sa Health Commitee sa konseho sa maong barangay ug mao usab sa Barangay Health Emergency Response Team (BHERT).

Ang pangan sa maong doktora subay sa resulta nga gipagawas sa Cebu City Health Department niadtong Sabado, Hulyo 11, anaa sa listahan nga apil kini nga nagpositibo dihang mipahigayon na og contact tracing.

Dugang ni Enriquez nga ang maong 56 anyos nga doktora nakurat kon nganong anaa siya sa listahan sa nagpositibo sa Covid samtang dunay iyang gihawiran nga resulta nga siya negatibo sa virus human siya boluntaryo nga nagpa-swab test.

Sa resulta nga gihawiran sa maong doktora niadtong Hunyo 29, mipaubos kini sa Nasal and Oropharyngeal Swab for Covid-19 test ug nasuta nga nagnegatibo kini human nigawas ang resulta niadtong Hulyo 1.

Apan sa resulta nga nadawat sa Barangay Guadalupe niadtong Sabado kon diin nianang adlawa usab gipahigayon nila Konsehal Enriquez ang contact tracing ug naapil ang pangalan sa mao nga doktora. (BBT)

***

(Story title was corrected. Ang tanod wala namatay sa Covid-19, matod sa kabanay niini. Negatibo ang resulta sa swab test sa maong tanod.)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph