MIBAHAD karon ang 6th Infantry (Kampilan) Division sa Philippine Army ngadto sa mga miyembro sa New Peoples Army (NPA) nga dili magpanuko ang militar sa paglusad og opensiba bisan panahon sa Semana Santa kun maghimo sila og samok.
Matud ni 602nd Brigade Commander Brigadier General Alejandro Estomo nga dili sila magduha-duha sa pagpulbos sa mga rebelde ilabi na nga way gipahamtang nga ceasefire karong Holy Week.
Dugang ni Estomo nga ila na nga natultulan ang gilubluban sa mga NPA nga maoy misunog sa duha ka sakyanan, miharas sa grupo ni Magpet Vice-Mayor Florentino Villasor apil na ang pag-atake sa Cafgu detachment sa Mlang.
Gipalig-on karon ang Civil Military Operation sa mga hilit nga dapit sa North Cotabato aron dungan nga ipaabot ang mensahe sa kabag-ohan nga walay paggamit sa puwersa nga posibleng makahagba sa katilingban.
Nasayran nga una nang giangkon sa militar nga mihuyang na ang kalihukan sa NPA sa Central Mindanao ilabina sa Sultan Kudarat, North Cotabato, Bukidnon, South Cotabato ug Saranggani Province.
Gikompirma sab ni M'lang Municipal Mayor Lito Piñol nga target sa mga rebelde ang ilang pamilya gumikan sa pagsupak ni Cotabato Vice-Governor Manny Piñol nga mohatag og campaign fee sa NPA hinungdan nga giatake niini ang munisipyo sa Magpet ug Mlang. (Edgardo Fuerzas)