GIDALA na sa Lanton Reformatory Center sa Apopong, General Santos City si kanhi Maguindanao Philippine National Police (PNP)-Provinial Director Senior Superintendent Piang Adam.
Kini nahimo human gipagawas sa korte ang commitment order alang sa pagbalhin sa kanhi opisyal sa PNP gikan sa San Isidro Police Station ngadto sa city jail.
Nasayrang si Judge Antonio Guerrero sa Regional Trial Court Branch 20 ang nagpagawas sa maong commitment order alang sa akusado.
Gumikan niini, gimando ni Police Senior Superintendent Pedro Austria, hepe sa Criminal Investigation and Detection Group Soccsksargen ngadto sa San Isidro PNP kon asa nakadetina si Adam, nga dad-on sa Lanton Jail ang akusado.
Si Adam, subling nasikop didto sa Davao City sa milabay'ng semana human nakaikyas gikan sa selda sa Sultan Kudarat Provincial Jail.
Si Adam nag-atubang og kasong illegal possession of firearms and explosives, gitudlo sab nga usa sa mga suspek sa masaker sa sitio Masalay, barangay Salman, Ampatuan, Maguindanao Province. (Edgardo Fuerzas)