LAING 13 ka mga bombero sa Mandaue City Fire Station nagpositibo sa coronavirus disease (Covid-19).
Sa miaging semana, usa sa ilang kaubang bombero nga nasakit sa Covid-19 namatay.
Tungod sa kamatayon sa mao nga bombero, gi-lockdown ang Mandaue City Fire Station sugod niadtong Hulyo 6, 2020.
Sigon ni FO1 Reil Demura, tigpamaba sa Mandaue City Fire Station, nga ang ilang mga personnel nagpositibo gi-isolate sa Cubacub Elementary School.
Ang tanang 50 ka mga kawani sa Mandaue City Fire Station gipaubos na sa reverse transcription polymerase chain reaction (RT-PCR) test.
Sa 50 ka mga kawani, adunay 14 nga nagpositibo, 13 ang aktibo samtang usa ang namatay.
Ang 13 ka mga aktibong kaso sa Covid-19 sa ilang estasyon way gipamati nga mga simtomas kun asymptomatic, sigon ni Demura.
Matod ni Demura nga kada adunay mogawas nga resulta nga nagpositibo, ang maong kawani kuhaon dayon sa estasyon ug ihatod sa Cubacub Elementary School.
Giklaro ni Demura nga ang tanang mga kawani nga anaa karon nahabilin sa ilang estasyon nagnegatibo sa swab test.
Apan bisan og nagnegatibo na sila, kinahanglan gihapon sila nga motuman sa 14 ka adlaw nga isolation.
Padayon gihapon ang mga kawani sa MCFS nga motuman sa mga protocol nga gipatuman sa dakbayan sa Mandaue
Usbon pa sab sila sa pag-swab aron masiguro nga nagnegatibo na sila sa virus.
Giklaro sab ni Demura nga way angay nga ikabalaka ang mga lumulupyo sa Mandaue kon adunay mga emergency o sunog tungod kay aduna silay sub-station ngadto sa Barangay Cubacub nga maoy moresponde sa mga alarma.
Gani aduna sab silay mga fire volunteers nga andam moabag kon adunay mga alarma.
Mapasalamaton sab ang tanang mga kawani sa MCFS sa ubang mga estasyon sa Bureau of Fire Protection sa lain-laing parte sa Sugbo sa paghatag nila og mga pagkaon ug vitamins.
Aduna say mga pribado nga indibidwal nga nanghatag sab nila og mga pagkaon. (KFD)