Roldan: Dugo nga risgo sa Covid-19?

KUMUSTA namo? Pwede na molaag apan bantay gihapon kay wa pa molukapa si Covid-19. Kahibalo ba mo nga ang tipo sa atong dugo may kalambigitan sa pagtakboy sa virus?

Sa tulo ka internasyunal nga pagtuon, ilang gipangita ang kalambigitan sa tipo sa dugo ug ang Covid-19. Ang mga scientists nangita’g ebidensya nga ang tipo sa dugo sa tawo usa ka “risk factor” aron ilang dugang matun-an ang hiyas sa virus ug makabantay ang mga daling mataptan sa sakit.

Ingon sa mga eksperto nga may nakita na silang timailhan kung kinsa kadtong daling matakdan sama sa mga lalaki kaysa mga babaye. Kadtong adunay sakit sa lawas daan, may Type 2 diabetes, sobra ang timbang, ug may seryuso nga sakit sa kasingkasing.

Mas dali sab matakdan ang mga itom ug latino nga Amerikano kaysa mga Asian American ug mga puti. Ug karon posible ang tipo sa dugo. Sa pagtuon nga gipublikar sa New England Journal of Medicine, gianalisa sa mga researchers ang datos sa 1,600 ka mga pasyente nga may grabeng Covid-19 nga nasulod sa ospital didto sa Espana ug Italia ug gikumpara kini sa 2,200 nga wala matapti sa virus.

Ilang nasuta ang dakong kalainan sa tipo sa dugo sa may sakit ug sa walay sakit. Ang mga tawo nga may Type “A” nga dugo kay may 45% increase risk o purohan nga mataptan ug mograbe sa sakit. Samtang ang mga tawo nga may Type “O” nga dugo kay 35% reduced risk o purohan nga mataptan sa sakit.

Ang usa ka limitasyon sa maong pagtuon kay wala kini gidesinyo nga masulti sa mga researcher kung unsang tipo sa dugo nga mataptan og mograbe sa maong sakit kondili, ang purohan lamang nga masakit.

Gawas niini, may duha pa ka pagtuon nga may susamang resulta. Niadtong Marso, ang mga researchers sa China nagkumpara sa 2,173 ka pasyente sa Covid-19 sa tulo ka ospital sa Wuhan ug Shenzhen ug sa 27,000 nga walay sakit o “normal people” ug ilang nasuta nga ang may Type “A” nga dugo kay may 21% nga purohan nga mataptan sa sakit samang 33% ang pag-ubos sa purohan nga masakit ang mga tawo nga may Type “O” nga dugo.

Niadto sab nga Abril, usa ka team gikan sa Columbia University naghiling sa 1,559 ka mga tawo sa New York City nga na-test kung nataptan ba sila sa Covid-19.

Ilang nasuta nga ang mga tawo nga may Type “A” nga dugo kay may 34% nga purohan nga mahimong positive ug kadtong mga tawo nga may Type “O” nga dugo kay may 20% nga pag-ubos sa purohan nga mahimong positibo.

Sa laing bahin, ang mga tawo nga may Type “AB” nga dugo kay 44% nga dili ma-positive sa test. Hinuon sa ilang paghiling, 21 lamang sa 682 ka mga tawo nga nag-positibo sa Covid-19 nga may Type “AB.”

Sulti sa mga researchers sa Columbia University nga parehas ang niguwang resulta sa ilang pagtuon sa Type “A” ug Type “O” sa pagtuon sa China.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph