DAVAO DE ORO -- Locally stranded individual (LSI) nga gikan Manila maoy bag-ong natalang kaso sa coronavirus disease (Covid-19) sa probinsiya.
Ang pasyente mao ang 34-anyos nga babaye nga natanggong sa Manila sukad pa Marso 11, 2020 sanglit buot siyang manarbaho sa abroad.
Nibiya siya sa Manila niadtong Hunyo 25, ug niabot sa siyudad sa Davao niadtong Hunyo 30 sakay sa Philippine Coast Guard ug nakaabot sa Provincial Capitol Complex sa DavOro sa mao gihapong adlaw.
Gidala dayon siya sa New Bataan ug gipailawom sa pagsusi ug gisulod sa Barangay Isolation Unit.
Hulyo 9, 2020, gi-swab test sa Rural Health Unit sa lungsod ug miguwa nga positibo ang resulta niadtong Hulyo 12.
Sama sa uban nga nagpositibo, asymptomatic sab ang pasyente ug naa karon sa Davao De Oro Provincial Hospital sa lungsod sa Montevista. (DTV)