POSIBLENG mobalik ilawom sa General Community Quarantine (GCQ) ang siyudad sa Davao gumikan sa namatikdan nga pagtaas sa kaso sa coronavirus disease 2019 (Covid-19).
Kini maoy pasiunang nakuhang impormasyon sa lokal nga kagamhanan kagahapon sa hapon gikan sa Inter-agency Task Force for the management of Emerging Infectious Diseases (IATF-EID).
Sa paghinabi sa 87.5 FM Davao City Disaster Radio, gikanayon ni Mayor Sara Duterte-Carpio nga nakadawat siya og pasiunang impormasyon gikan sa IATF-EID nga ang dakbayan sa Davao ipailawom og balik sa GCQ.
Apan gisulti sa mayor nga moapela ang local nga kagamhanan ngadto sa ahensiya nga ipabilin kita ilawom sa Modified GCQ ug mahibaw-an kini karong Miyerkules, Hulyo 15.
Sumala sa mayor nga ang pagbalik sa GCQ dunay dakong epekto, ilabi na niadtong nagsugod na og abli nga mga negusyo dinhi sa dakbayan.
Tungod niini, nanawagan ug nag-awhag ang mayor sa siyudad ngadto sa katawhan nga kinahanglan nga sundon gayud ang upat ka mga importanteng quarantine guidelines ug di mokompiyansa bisan pa og kaila lang ang gikaistorya.
Gitumbok sa mayor ang pagpabilin sa balay, magsul-ob og face mask, social distancing ug kanunay nga paghugas og kamot.
Kahinumdoman nga gisulti ni Duterte-Carpio niadtong niaging semana nga walay plano ang dakbayan nga mobalik sa Enhanced CQ ug GCQ.
Sa kasamtangan ang dakbayan ilawom na sa Modified GCQ gikan niadtong Hulyo 1 nga matapos karong Hulyo 15, Miyerkules.