BauerTek Corp. mi-donate og face masks sa 3 ka siyudad sa Metro Cebu

ANG BauerTek Corporation, usa ka research, development ug manufacturing company nga nagbase sa Guiguinto, Bulacan, ang nidonar og masks ngadto sa lokal nga kagamhanan sa dakbayan sa Cebu, Mandaue ug Lapu-Lapu.

Gipahibawo ni Richard Nixon C. Gomez, general manager sa BauerTek, nga moabot ngadto sa 15,000 ka re-usable ug washable mask diin ang tulo ka mga nahisgutang local government unit adunay tag-5,000 ka masks nga magamit sa frontliners o ngadto sa intended beneficiaries.

Ang donasyon gipaagi sa grupo sa Association of Reporters in Mandaue-Lapu Lapu in Truth and Excellence (Armalite) nga gipangulohan ni Norman Mendoza, reporter sa dySS.

Nipasalig si Gomez nga ang maong masks, tested ug certified sa government testing laboratories nga makapanalipod sa nagsul-ob batok sa coronavirus disease 2019 (Covid-19).

“High water repellent, 85% to 95% which means high protection from contamination through droplets. High breathability, more comfortable and is recommended for community use,” matod ni Gomez.

“Does not ignite under specific lab test conditions and passed non-flammability test,” pasabot ni Gomez sa ilang libreng gipanghatag nga masks.

Si Lapu-Lapu City Mayor Junard Chan, sa iyang bahin, nga usa sa nakadawat sa donasyon ang nahinangop sa BauerTek Corp.

Mipasalamat si Chan sa BauerTek sa maong donasyon, ilabi na nga dako kini og ikatampo sa ilang kampanya batok sa Covid-19.

Si Chan usa ka Covid-19 survivor ug laing duha ka mga taas nga opisyal sa dakbayan nga nagnegatibo na sa pagkakaron.

Atol sa iyang state of the city address dili pa lang dugay, kini hugot nga nipaisdaan sa iyang konstituwente nga hugot mosunod sa protocol batok sa Covid-19, labi na ang pagmando sa pagpahamtang og dakong multa o silot sa mga tawo nga mogawas nga walay face mask, atol ning Covid-19 pandemic. (PR)