PIPILA sa mga taga-ABS-CBN nga atong nahinabi niangkon nga daghan nila ang nakahilak gyud human gipatay sa Kongreso ang gipangamuyo nila nga mahatagan og bag-ong prangkisa ang ilang estasyon.
Ang mga naa sa ubos ang pinakaapektado ug nahitabo pa kon kanus-a dunay dakong krisis ang nasud tungod sa pandemya.
Way kaso ang mga dagkong artista sama nilang Angel Locsin ug Vice Ganda nga nakapundar na og sakto. Ang makaluluoy ang mga gagmay nga nagsugod pa lang sa industriya. Kon duna may kalapasan ang tag-iya nganong iangin man ang tibuok kompanya?
Pero motuo ko nga makabalik pa gihapon ang ABS-CBN. Dili pa lang tingali karon apan sa tukmang panahon.
Sama sa giingon ni Senador Panfilo Lacson: “You will fall today, you will rise tomorrow and that’s for sure. It is as simple as that.”
Kon si Kim Atienza pa: “Ang buhay ay weder-weder lang.”
AIRBORNE
Kabantay mo paspas kaayo ang dagan sa mga adlaw? Usa sa mga rason tingali kay usa ray atong routine karon.
Di pareho sa una nga daghan tang kasuroyan. Puwede ka motan-aw og sine. Mag-beach. Mag-malling. Mag-gym. Sa eyes sa nose at kung ano-ano pa... kung minsan nga kulang ang isang araw para magkasama kayo... Ayay nahimo na man ning kanta.
Bitaw, seryusly, ang nakapait sa amoa karon kay ang tupad namong eskwelahan gihimo na nga isolation center sa mga Covid positive.
Mao nga bisan naa ra mi sa balay dili na gyud kakumpiyansaan. Labi pa kon tinuod ni ilang giingon nga airborne ang virus.
Mahadlok na sad tang moadto og ospital kay halos tanang findings karon puros na lang Covid covid covid. Di ba kaha kita ray gibinoangan ani!? Ayuda pa more!
Ingnan bitaw ta mo sa una nga sirad-an nang atong mga border kay kanang mga frontliner nga nagtrabaho sa Cebu city nga mag-ulian kada-adlaw mao ni silay magda og virus. Ang motor backriding man hinuoy gitutokan. Pastilan. Ka-brayt!