DEAR Noy Kulas,
Maayong adlaw. Tawga lang kog Onyot. Nia ra ko sa Cebu City. Minyo ko sulod sa 12 ka mga tuig ug naay duha ka mga anak. Sukad pa sa among pagkaminyo, anhi na nitipon sa among balay ang mga ginikanan sa akong asawa.
Wala man koy issue sa akong asawa, wala pud ko nag mind nga amoa ang pag provide sa tanang kinahanglanon sa panimalay. Gayud lang usahay murag bation ko nga murag dili mi minyo, kundili murag managsuon kay tungod nga ang iyang mga ginikanan anaa man kanunay. In fairness, dako silag natabang pag-atiman sa mga bata ug mga buluhaton sa balay. Ug naay kaila nilang moanhi, daghan ang nagtuo nga balay ni sa akong mga ugangan ug ako maoy nangipon nila.
May mga panahon nga bisag wala koy buhaton, dili murag ko ganahan moestambay sa among balay kay sum-ol ra paminawon nga naa permi akong mga ugangan. Halos wala mi mga butang nga pwedeng hisgutan nga dili ma saw-an ang topics sa mga ginikanan. Nakahuna-huna kong magpayag sa akong yuta sa probinsiya aron didto mag relax-relax kun bati-on kog puol dinhi sa syudad. Pero malooy ko sa mga bata kay mangita man nako. Pero akong asawa, sa paminaw nako, maorag mas okay ra niya nga wala ko sa amoa kay sa sa iyang mga ginikanan. Mao ning paminaw ko, murag nahimo na hinuon kong 2nd class citizen sa akong kaugalingong panimalay. Unsa may imong ikatambag nga maayo nakong buhaton ini, Noy? Daghang salamat. Be safe!
Matinahuron,
ONYOT
Onyot,
Naandan ra na nga feeling kanang imong na experience karon. Apan bisan unsaon nato, kon magpakasal na man gani ta, package na gyud na. It means, apil na ang pamilya. Human sa kasal, ang mga ginikanan sa imong asawa imo na sab nang parents kay usa na man human gibug-os sa kaminyuon. Imo usab nang dawaton kay nakatabang man usab sila kaninyong magtiayon kay naa man sila nga nakatan-aw sa mga bata.
Human unya nga molugak ang quarantine o mag new normal, pangita sab mog higayon sa imong asawa nga kamo lang ang mag-uban mong duha nga kamo lang. Estoryahan ninyong duha ang inyong sitwasyon. Isulti nimo ang unsay imong na-feel karon aron usab siya makahibawo unsay naa sa imong kahiladman. Ayaw kini iluom aron malikayan ang future conflict. Lisod ra ba nang feeling nga di ikapagawas, mobuto na sa kalit.
Pag-ampo nga imong madawat ang sitwasyon, makita mo ang positibong aspeto sa inyong kahimtang karon.
NOY KULAS