OPISYAL sa kapulisan ang naangol apan ang pasahero niyang menor de edad patay human ang iyang gimanehong sakyanan nabangga sa punoan sa kahoy sa daplin sa national highway sa Barangay Abugon, lungsod sa Sibonga, Hulyo 12, sa alas 11:50 sa gabii.
Si Police Lt. Warren Kuhay, 38, instructor sa Regional Special Training Units (RSTU-7) nga nakabasi sa Barangay Bahay, Sibonga, nakaangkon og seryusong kadaot sa lawas. Naangol sab ang iyang pasahero nga si Rondey Romero, 23, taga Bahay.
Apan dead-on-arrival (DOA) sa tambalanan ang laing kauban nga si Gerald Barolo Natividad, 17, taga Bahay.
Si Police Master Sgt. Bernard Oteda sa Sibonga Police Station nga nahinabi sa Superbalita Cebu nagkanayon nga si Lt. Kuhay maoy nagmaniho sa iyang Pajero YEU-848 gikan sa Barangay Napo, dakbayan sa Carcar padulong na mopauli sa Barangay Poblacion, Sibonga uban sa duha ka mga higala.
Apan pag-abot sa karsada sa Abugon, nawad-an sa kontrol sa manobela ang pulis opisyal.
Misaliring ang sakyanan hangtod nga nabangga sa punoan sa kahoy.
Tungod sa kakusog sa impact, natumba ang sakyanan ug nagrabigan silang tulo.
Pero ang menor nga si Natividad patay na pag-abot sa ospital sa Sibonga.
Si Kuhay ug si Romero gidali sa pagbahin sa tambalanan sa dakbayan sa Sugbo.
Matod ni Oteda, posibling nakatagpilaw ang maong pulis samtang nagbiyahe hinungdan nga pagkabanga.
Gihulagway niini ang maong dapit usa ka hilan nga karsada daghan katingadhan ingon man daghang disgrasya dunay namatay. (GPL)