TULO ka frontliners ang nagpositibo karon sa dakbayan sa Talisay.
Kini naglakip sa jail officer sa Bureau of Jail Management and Penology (BJMP) 7 nga naanadestino sa Talisay City Jail.
Ang laing duha mga sakop sa disaster sa Talisay City Rescue Assistance Team (Treat).
Ang tulo pulos anaa na karon sa usa ka isolation facility sa Talisay.
Matod sa warden sa Talisay City Jail, J/SInsp. Crsyrel Awe nga nahinabi sa Superbalita Cebu, ang usa ka nagpositibo apil sa 30 nga nipaubos sa rapid testing sa milabay nga semana, gawas lang sa unang usa nga naa na sa isolation center facility.
Dugang ni Awe nga iya dayon nga gipalahi ang usa ngadto na sa 29 nga kaubanan nga nag negatibo ang ilang resulta aron dili kini makatakod.
Wala kini simtomas ang 40 anyos nga BJMP personnel.
Samtang, si Talisay Mayor Gerald Gullas, Jr. nikompirma nga dunay duha ka mga nagpositibo nga mga sakop sa Treat human nagpositibo sila sa Covid-19 atol sa ilang rapid testing matag semana.
Dugang ni Gullas nga walay angay kabalak-an sa duha tungod kay gilain na nila kini ug wala una sila gipatrabaho.
Ang pamilya sa duha ka sakop sa Treat, gipaubos na usab sa swab test kagahapon, Hulyo 13.
Gihulagway sa mayor nga mas maayo nga ang usa ka sakop sa disaster team ipaubos og sinimana nga rapid testing aron masiguro ang ilang kahimtang ug mao nga nasuta nga duha niini nagpositibo sa virus.
Gipili lang ang mga tawo nga ipaubos sa swab test nga kadtong dunay close contact sa duha ka mga nagpositibo sa Covid-19.
Ang dakbayan sa Talisay dunay 12 ka mga bag-ong kaso sa Covid-19, Lunes, Hulyo 13, diin tulo sa 12 ang namatay.
Ang Talisay ubos sa general communuty quarantine (GCQ). (BBT)