SUPERBALITA CEBU

Tuob kits wa palita, gidonar diay

GIDONAR sa wa nagpaila nga supplier ang 1,000 ka tuob kits nga giapud-apod ngadto sa asymptomatic Covid-19 patients sa kanhi mga barangay isolation center (BIC) niadtong Mayo.

Ang Siyudad way gasto niini.

Kini ang gipahibawo ni City Legal Officer Rey Gealon, spokesperson ni Mayor Edgardo Labella, agig tubag sa kontrobersiya nga nilutaw nga giingong gipalit sa Siyudad ang tag P2,500 nga tuob kit.

“The intention of the supplier was to donate all along. BAC papers were just prepared in case no good Samaritan would come out, but there was. So, no harm done,” pasabot ni Gealon sa iyang teleconference sa Hulyo 13, 2020.

Si Gealon nipadayag nga anaa ni Labella ang desisyon ra unta kon mopalit ba o di og tuob kits.

Apan ang mayor una rang nipadayag mga di mogasto ang City Government para sa maong gamit.

“At the end of the day, it is the mayor who approves of those purchases, but he is not inclined should he be asked to do so in the first place,” dugang ni Gealon.

Si Labella, sa hinapos sa miaging semana, nanghunaw sa taho nga nipalit ang Siyudad og 1,000 ka tuob kits sa tag P2,500 ang matag usa kun P2.5 million ang tibuok transaction.

Matod sa mayor nga wa siya masayod sa pagpamalit ug di usab mobayad ang Siyudad sa Sugbo kon duna man.

Si Gealon nipasabot nga pabor ang mayor sa pagpahigayon og tuob gumikan sa maayong epekto niini, apan walay intensyon nga mopalit og mga galamiton.

“Supporting the practice of tuob and purchasing tuob kits are different issues altogether. While the mayor may be into tuob himself, but buying paraphernalia as tuob kits cannot be countenanced by the mayor,” dugang sa city attorney.

Ang kit gilangkuban sa electric water heater, steam gown, plastic chair, tualya ug planggana.

Si Konsehal Jerry Guardo, kinsa maoy nangusog sa konseho ug nipalabang og resolution kauban si Konsehal Nestor Archival niadtong Abril, niawhag kang Labella sa pagtuon sa maayong epekto sa tuob kun steam inhalation.

Dugang ni Guardo nga nalipay siya nga adunay gipanghatag nga tuob kit ang City Government ngadto sa mga pasyente sulod sa BIC.

Kini gihangop sa mga pasyente sa coronavirus disease (Covid-19) nga nihulagway sa epekto nga nakapagaan ug nakahatag og alibyo sa ilang balatian.

Gitug-an ni Guardo nga aduna siyay gipanghatag nga 1,000 tuob kits ngadto sa Alsa Bisaya Association.

Apan donasyon usab kini sa iyang higala nga si Ronald Elpa alang sa 1,000 ka mga pulis gikan sa Police Regional Office (PRO) 7 nga gidawat ni Police Brigadier General Albert Ignatius Ferro, hepe sa rehiyon.

Ang giingong pagpalit, apan diay donasyon, wala mauyoni ni Konsehal Alvin Dizon.

Matod ni Dizon nga wa siyay pagkontra sa tuob, apan kini kataw-anan kon gastuhan og kwarta sa gobyermo sanglit mahimo ra nga makatuob bisan wala ang maong mga kit.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph