SUPERBALITA CEBU

Mongaya: App alang sa contract tracing

Panahom

ATONG nasayran nga duna diay digital app kabahin sa contact-tracing sa mga pagtakod-takod sa Covid-19 nga hinimog Sugboanon. Sa akong nasayran, dugay na gipahibawo ang Cebu City Hall niini. Apan, wa kini magamit.

Naghuwat ang atong kadagkuan sa Siyudad sa Sugbo sa team nilang Mayor Benjamin Magalong sa Siyudad sa Baguio nga moanhi aron manudlo. Nahisgutan sab kining contact-tracing app sa Siyudad sa Ormoc.

Mayor Edgar Labella, better late than never man tingale labi na karon nga nagkasaka gihapon ang atong Covid-19 cases.

Tuob mystery

Nanghunaw sila si Mayor Labella ug Konsehal Jerry Guardo nga may kalabutan sa giingong pagpalit og 1,000 nga mga tuob kits sa kantidad nga P250,000. Alang sa kadaghanan, bastos man gud nga mopalit og tag P2,500 kada tuob kit.

Nganong mopalit gani nga naa ra man sa balay ang mga magamit alang sa tuob? Kada panimalay naay plangana, tualya, takuri ug stove. Tingale, ang paliton mao ra ang isagol sa init tubig sama sa eucalyptus, luy-a, ug uban pa. Nakasuway man gani ko dihang niinsister si Misis nga makapaluag sa ginhawa dihang nitukar ang akong allergic rhinitis.

Gipangwarta pa gyud imbes mapalit na lang una og ayuda alang sa mga gipang-lockdown. Makaingon man sab kita nga pure evil. Apan si Mayor Labella niinsister nga wala siyay kalibutan kabahin sa maong pagpalit sa tuob kit. Gani iya kining ipaimbestigar.

Sa pagkakaron, makaingon lang gyud ko nga misteryuso kining procurement system sa syudad. Kinahanglan mailhan nato kinsa kini si Mister Yuso.

Ngilngig ni siya kay makapalusot og minilyon apan manghunaw ang konsehal nga nagduso sa maong proyekto. Manghunaw sab ang mayor.

Nagamit gyud hinuon ang plangana alang sa panghunaw.

Laing patay

Duha na ka lain-laing mga tagtungod sa namatyan tungod sa Covid-19, apan nakadawat og certificate of recovery unya na-discharged daw.

Nagduda ko karon nga dili lang kini duha sila. Ug mas maayong maningog kining mga namatyan nga nakadawat sa maong mga certificate.

Nagduda gyud ko nga dili kini ordinaryong sayop. Daw gituyo nga paubsan ang statistics sa namatay ug patas-an ang giingong nangaayo.

@anol_cebu sa Twitter


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph