SUPERBALITA CEBU

Espinoza: Istriktong kwarentinas ipadayon

Nagpakabana

HUSTO. Dunay nagpasupot sa social media (di lang nako hinganlan) og undanon nga punto kabahin sa pagtugot sa IATF sa mag-asawa, live-in partner o sakop sa pamilya nga makaangkas sa motorsiklo apan dunay babag nga mag-uwang sa driver ug sa angkas. Ang pangutana, ngano nga butangan pa man og babag kon ang moangkas asawa, kaipon, ug sakop sa pamilya?

Tinuod, morag wa mahaum sa pangatarungan nga ang mag-asawa o kaipon, nga di malalis nagpuyo sa usa ka balay ug magdulog sa panahon nga matulog apan kon mosakay sa motorsiklo kinahanglan dunay babag nilang duha aron kunohay walay kontak kay matud pa sa Department of Health (DOH) naa sa kontak nga matakdan ang tawo sa Covid-19.

Gawas nga mag-asawa o kaipon ang mosakay sa motorsiklo, magsul-ob pa gyud og helmet, nga dunay tabon sa nawong. Hinuon, dili tanan helmet dunay tabon sa nawong apan magsul-ob man gihapon sila og face mask kay mao man ni ang gipatuman sa DOH aron malikay sa virus.

Ang dakong kabalaka mao ang safety unya sa mosakay sa motorsiklo tungod sa babag nga delikado sa kusog nga hangin. Gani, dunay lain pangutana kon dunay bay pagtugot ang Department of Transportation (DoTr), nga maoy dunay katungod kabahin sa mga sakyanan.

Si Interior Sec. Eduardo Año maoy nagtugot nga mahimo na mosakay sa motorsiklo ang mag asawa o kaipon basta dunay babag nilang duha. Apan, pahibawo sa tanan nga ang gitugtan sa backride sa motorsiklo mao ang mga dapit nga general community quarantine (GCQ) ug modified GCQ na.

Ako lang ni pangagpas. Gitugtan ni Secretary Año ang backride sa mag-asawa ug sakop sa pamilya nga dunay babag ang driver ug pasahero agi og pagsulay kon dili ba ni siya delikado sa atong kadalahanan ug sa safety sa mosakay aron maoy iyang basihan unya sa pagrekomendar nga mahimo na nga mamasahero ang motorsiklo sama sa Angkas o habal-habal tungod sa kakuwang sa transportasyon.

* * *

DILI PA? Sa July 16 gitakda nga malibkas ang ECQ sa dakbayan sa Sugbo. Si Environment Sec. Roy Cimatu, nga maoy nagpatuman sa kwarentinas, miingon nga dunay posibilibad nga maubos sa GCQ ang dakbayan sa Sugbo. Apan si DOH Sec. Francisco Duque III nagdumili nga iubos sa GCQ ang dakbayan. Gani, giawat ni Cebu city Vice Mayor Mike Rama ang punto ni Duque.

Si Secretary Cimatu mirekomendar nga granular na lang ang kwarentinas sa mga dapit nga dunay Covid-19 ug dili na ang entiro barangay. Sa ingon ani nga pamaagi ang dakbayan mahimo nga i-ubos sa GCQ. Di ni pagbasul, apan ang nahitabo sa miagi kay gilugakan ang kwarentinas sa dihang na GCQ ang dakbayan nga ang katawhan nanggawas bisan walay tuyo. Naa pay nagsayaw sa dalan ug daghan ang nagsugal.

Kon maubos man sa GCQ ang dakbayan sa Sugbo unya, angay nga masabtan sa tanan nga naa pa gihapon ang coronavirus. Wala ni nagpasabut nga kon GCQ o MGCQ na ang dakbayan, wala na pud ang Covid-19. Kinahanglan ipadayon ang estrikto nga pagpatuman sa kwarentinas.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph