TULO ang nangaangol human nahulog ang dyip niadtong Lunes mga alas 10:00 sa gabii sa Malasag, Cugman ning siyudad sa Cagayan de Oro.

Pulos nadala sa Northern Mindanao Medical Center (NMMC) ang mga biktima nga mao sila si Jomar Wabe, 16, taga Buena Oro, Macasandig ning siyudad; Allan Kalao, 22, sa susamang dapit, driver sa dyip nga Gusa Liner ug Rochelle Ganido, 19, taga Lapasan ning siyudad.

Giingong gikan sa Malasag Garden ang mga batan-on dihang pagtugbong niini nawad-an sa brake ang driver ug nilahos kini sa pangpang nga bahin ug nahulog.

Maayo na lamang nga nakabantay ang mga biktima ug nakahawid sa dyip hinungdan nga wala nangahulog.

Pulos bun-og sa lawas ang nangaangkon sa biktima samtang samaran ang simod ni Ganido nga nabunal sa kilid nga bahin sa dyip.

Gitabang ang mga biktima sa mga nakasaksi sa hitabo ug gipangdala sa NMMC ning siyudad aron patambalan. Ang mga Brgy Tanod sa maong dapit ang nitabang sa pagkuha sa nahulog nga dyip. Gani ang hitabo wala na gitaho sa kapolisan sa Police Station 10 sa Cugman.

Hinuon luwas na ang mga biktima sa makuyawng kahimtang apan padayon pang nagpaalim sa ilang mga samad nga naangkon. (SVB)