Barangay hall sa Poblacion, Talisay gibuksan og balik

Hulagway gikan sa Google Street View
Hulagway gikan sa Google Street View

GIBUKSAN na pagbalik ang barangay hall sa Poblacion, Dakbayan sa Talisay dungan sa pagpabalik na og duty sa mga barangay health worker (BHW) ug mga tanod, ingon man unom ka mga staff.

Nasuta sa contact tracing nga lima lang ka mga barangay tanod ang naka direct contact kang tanod Ernesto Royo Jr., kinsa namatay sa miaging semana.

Si Royo namatay niadtong Hulyo 10 sa Talisay District Hospital human magkalibanga. Negative ang resulta sa iyang rapid test samtang ang swab test result wa pa mogawas.

Matod ni Barangay Kapitan Edward Alesna nga ilang natino nga lima lang ka mga barangay tanod maoy direct contact ni Royo kay maoy ninghatod kaniya sa ospital.

Lakip sa gi-quarantine ang unom ka mga sakop sa pamilya ni Royo.

Ang kapitan niingon nga gitawgan usab siya sa Talisay City Health Department nga ang angay lang i-quarantine mao kadtong direct contact ni Royo.

"Lisod kaayo. Daghan ta og mga atimanon mao to nga ako na giablihan ang barangay hall," pasabot ni ni Alesna sa Superbalita Cebu.

Gipa-sirado sab ni Alesna og pipila ka mga adlaw ang barangay hall samtang gi-disinfect.

Gitataw ni Alesna nga ang mga lakang puro ra panagana samtang naghuwat pa sila sa swab test result.

Gipaneguro sa kapitan nga silang mga barangay official ug staff kanunay nagtuman sa mga health protocol aron kalikayan ang pagpanakod sa coronavirus disease (Covid-19).

Iyang giawhag ang iyang mga konstituente nga bisan naa sa general community quarantine ang dakbayan, mag-amping gihapon kanunay, mosunod sa tanang mga lagda nga gilatid sa Department of Health (DOH) sama sa kanunay nga pagsul-ob og face mask, physical distancing ug kanunay nga pagpanghunaw sa mga kamot.

Likayan una ang mga panagtapok nga magbutang sa risgo sa pagpanakod sa Covid-19. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph