MOKABAT na sa 607 sa 643 o 94 porsyento sa kinatibuk-ang mga pasyente sa coronavirus disease (Covid-19) sa Eastern Visayas ang nakarekober gikan sa sakit.
Kini ang gibutyag sa Department of Health (DOH)-Eastern Visayas, Lunes, Hulyo 13, 2020.
Tungod niini, 36 na lang ang nagpabilin nga positibo sa Covid-19 nga gihulagway sa departmento nga mga asymptomatic.
Tulo naman ang natala nga namatay sa mao nga sakit.
Sagad sa infected nga mga pasyente gikan sa gawas sa Eastern Visayas, dugang sa ahensya.
Matod sa DOH, sa kinatibuk-ang ihap, 595 ang asymptomatic, 48 ang dunay mild symptoms ug tulo ang severe cases.
Ang 40 niini ka mga kaso na-admit sa ospital.
Sa mga naigo og Covid, nag edad, ang labing bata nag-edad og upat ka buwan nga masuso samtang ang labing tiguwang 83 anyos.
Sa 643 ka mga kaso, 381 o 59 porsyento niini mga lalake.
Sagad sa mga gigikanan sa Covid-19 o 484 ka kaso sa rehiyon gikan sa gawas sa Eastern Visayas, 162 lang ang locally acquired.
Ang 426 niini mga locally stranded individuals (SLI), 52 ang mga overseas Filipino workers ug tulo ang sa Balik Probinsya.
Mokabat naman sa 104 ka healthcare workers ang nataptan sa sakit, apan 103 na ang naka recover.
Ang bugtong nahabilin nga nagpaalim pa, gi-isolate.
Sa breakdown sa mga probinsya, nag-una nga labing daghan og mga kaso ang Lalawigan sa Leyte, diin naa sa 388.
Sunod ang Samar nga dunay 119 ka mga kaso, Southern Leyte dunay 88, Biliran dunay 26, Northern Samar dunay 22, ug Eastern Samar dunay tulo.
Sa 36 nga pabiling nagpositibo sa Covid-19, usa niini gikan sa Biliran, 22 gikan sa Leyte, duha gikan sa Northern Samar, tulo gikan sa Samar, ug walo gikan sa Southern Leyte.
Si DOH-Eastern Visayas Director Minerva Molon mihangyo sa publiko nga di mag-relax bisan sa pag-ubos na sa mga kaso.
Padayon gihapon ang infection prevention and control measures sama sa social distancing, pagsul-ob og face mask, paghugas sa mga kamot ug stay at home kon way importante nga lakaw. (JKDP)