OPPS... Sa niaging semana, atong gihisgutan dinhi ang desisyon kalabot niining mga basketball players dinhi sa Sugbo nga manglayat didto sa Kaulohan human makadawat og tanyag sa mga Manila-based school teams.
Ang uwahing mipadayag nga adto na moduwa sa Manila mao ang most valuable player (MVP) sa Cebu Schools Athletic Foundation, Inc. (Cesafi) juniors division nga si Loebert Andrew “LA” Casinillo.
Si Casinillo, 6-1, mikomiter sa University of Santo Tomas Tiger Cubs sa University Athletic Association of the Philippines (UAAP), sa umaabot nga season.
Kini human nga nakadawat og tanyag gikan gikan mismo sa coach sa UST nga si Aldin Ayo.
Niadto pang Enero gihaylo si Casinillo apan niadtong lang Mayo 1 ang kini pormal nga midawat sa tanyag human gianunsyo nga walay Cesafi karong tuiga.
Pero kahibawo ba mo nga aduna usay laing potensiyal nga college player sa Cesafi ang nakadesider nga adto na usab sa Manila moduwa?
Ang batan-on ug gilantaw nga usa sa mga mahimong star player sa Sugbo nga si Gabriel Cometa sa University of the Visayas (UV) Green Lancers ang nakadesider na usab nga mobalhin sa San Beda Red Lions.
Matod pa sa tinubdan, dugay na diay ning gihaylo ang flashy-pointguard nga Cometa sa San Beda, apan wa usab dayon kini mokagat.
Pero, sama kang Casinillo, sa dihang gipahibawo nga walay Cesafi karong tuiga, nakahukom na lang usab kini sa pagdawat sa tanyag.
Si UV headcoach Gary Cortes mikompirmar niini. Hinuon wala kaayo siya mohatag og detalyi gawas lang sa pasumbingay nga kon kinsa ang mahabilin mao ray iyaha.
Kon kahinumdoman, si Cortes, daan nang mipadayag nga sayo ra kaayo ang pagpahibawo nga walay Cesafi karong tuiga tungod sa hulga sa coronavirus (Covid-19).
Samtang ang UAAP ug NCAA didto sa Kaulohan nagpadayon pa hangtod karon sa ilang pagtuon ug pag-obserbar sa kalamboan o dagan kalabot ning nagpadayon nga krisis.
Seryuso ug andam silang mo-adjust sa ilang schedules nga sa samang higayon nangita usab og igong kahigayonan.
Mao nga walay undang sa pagpangandam ang tagsatagsa ka mga eskuwelahan. Ako nagtuo, nga gawas niining duha nga atong nahibaw-an, duna pay daghan nga manglayat didto sa Kaulohan sa umaabot nga mga adlaw.
SLAUGHTER
Dunay anino sa pagkakomplikado kining pagpirma sa Sugboanong si Greg Slaughter ngadto sa usa ka Serbian agency nga mao ang BeoBasket.
Sa ato pa ang BeoBasket nga gidumala ni Miodrag Raznatovic, mao na ang mo-negotiate og mga team alang sa 7-0 nga kanhi produkto sa University of the Visayas (UV) Green Lancers.
Si Slaughter, kanhi sentro sa Barangay Ginebra, ang wala na mopakita sa Kings human mo-expire ang iyang kontrata.
Bisan pa man niini, sa higayon nga gusto siyang moduwa og balik sa PBA, ang Ginebra mao gihapon ang makaangkon sa iyang right tungod kay aduna man kini offer ngadto kaniya nga wala niya matagad human mo-expire ang iyang kontrata niadtong Enero 31.
Pero dili maka-negotiate ang iyang manager ngadto sa Ginebra tungod kay wala may lisensiya ang BeoBasket sa isip agent sa PBA.
For sure dili sab mosugot ang BeoBasket nga si Slaughter maoy mangunay og negotiate ngadto sa Ginebra tungod kay anaa man kini kontrata niya.
Tungod niini, hayag ang posibilidad nga ang negusasyon sa BeoBasket adto iliwag sa lega gawas sa nasod. Apan lantawonon pa usab kini kon wala ba magkinahanglan og aprobal sa PBA kon si Slaughter kon moduwa ug laing lega gawas sa nasod.
Adunay lagda sa Fiba rules, nga nagkanayon nga kinahanglan adunay pagtugot sa lega kon ang players moduwa og laing lega.
Ambot og applicable ba ni sa sitwasyon ni Slaughter kay kini ra bang PBA mosunod kon unsay mando sa Fiba.
Nahinumdom mo sa pagkasuspenso sa atong mga players niadtong nahitabong karambola tali sa Gilas ug sa Australia nga gipangsuspenso sa PBA ang mga nalambigit sa kagubot?
Ang kang Keifer Ravena nga kaso diin taod-taod kining gisuspenso sa PBA human madiskobrehi sa Fiba nga nakagamit og illegal substance? Hinaot nga dili kini mahitabo ni Slaughter. jun.migallen22@gmail.com