SAMTANG wala pa mabalik ang basketball tungod sa pandemya, ang Sugboanong higante ug pambato sa San Miguel Beermen (SMB) nga si June Mar Fajardo anaa makita karon sa iyang Facebook streaming.
Ang lumad nga taga Pinamungajan, Cebu mahiligon nang daan sa e-sports sama sa sikat nga online games nga Mobile Legends ug DOTA sa wala pa ang lockdown sa nasod.
Tungod anaa may pandemya, iyang nahunahunaan nga magbuhat og live streaming page para maka-interact siya sa mga fans.
Ang Mobile Legends ug DOTA mao ang pinakasikat nga online games sa nasud ug kadaghanan sa mga batan-on gaduwa niini lakip na ang 6-foot-10 nga six-time PBA Most Valuable Player (MVP).
“Lagi talaga akong naglalaro ng online games, so naisip ko gumawa na lang ako ng channel para din makapag-interact ako sa mga fans in time of this crisis,” matod ni Fajardo sa taho sa Spin.PH Life.
“Ngayon lang ako nag-stream, habang wala pang PBA.”
Alang sa mga fans ni Fajardo ug mahiligon sa online games makita siya sa AHOSgaming sa Facebook.
“Wala rin naman akong ibang magawa sa bahay aside sa workout at movies. Kaya at least habang streaming, nakaka-interact ko rin ang mga fans. Enjoy naman tsaka masaya kasi nakakalaro ko ‘yung mga viewers at fans,” matod ni Fajardo.
Ang 30-anyos nga alumni sa University of Cebu kasamtangang nagpaalim sa iyang angol (fracture right tibia).
Matod ni San Miguel headcoach Leo Austria maayo ang dagan sa recovery ni Fajardo apan di siya magdahom nga makaduwa na ang iyang pambatong sentro karong tuiga.
“I think next season is when he’ll be able to play because the doctor gave him 10 to 12 months of rest time so that he’s in maximum health before we can say he’s back to normal,” asoy ni Austria.
Si Austria miingon nga walay angay ikabalaka sa healing process ni Fajardo kay padayong gi-monitor sa San Miguel team ang iyang rehabilitasyon samtang naka-quarantine sa ilaha.