PINAAGI sa iyang post sa social media, gibutyag ni Houston Rockets superstar Russell Westbrook nga nasutang positibo siya sa coronavirus disease 2019 (Covid-19).
Hinuon gitataw ni Westbrook nga nahimo siyang positibo sa Covid-19 sa wala pa ningbiyahe ang Rockets paingon sa Orlando, Florida alang sa pagbalik sa aksyon sa National Basketball Association (NBA).
“I’m currently feeling well, quarantined, and looking forward to rejoining my teammates when I am cleared,” pamahayag ni Westbrook. “Please take this virus seriously. Be safe. Mask up! #whynot.”
Si Westbrook ug ang laing superstar sa Rockets nga si James Harden parehong wala mokuyog sa pagbiyahe sa team paingon sa Walt Disney World Resort diin ipahigayon ang tanang mga duwa sa pagtiwas sa 2019-20 season sugod karong Hulyo 30, 2020.
Ang beteranong forward nga si Luc Mbah, kinsa mipirma sa Rockets sa sayong bahin ning buwana, wala sab mikuyog sa biyahe.
Wala gibutyag ni coach Mike D’Antoni kon unsa’y rason nganong wala ningkuyog sa ilang biyahe ang tulo ka nahisgutang mga magduduwa.
“These are things that people are dealing with,” pasabot ni D’Antoni. “We’re not going to get into why not. They’re on their way.”
Wala pa masayri kon makaduwa ba si Westbrook sa Orlando gumikan kay nagdepende pa kini sa iyang kondisyon.
Ang ubang mga magduduwa nga nataptan sa Covid-19 sama nila ni Spencer Dinwiddie ug DeAndre Jordan sa Brooklyn Nets nakadesisyon nga dili na lang moduwa sa Orlando.
Si Harden ug Mbah gilaumang maabot sa Walt Disney World Resort sa umaabot nga pipila ka mga adlaw.
Sa pagkahunong sa season niadtong Marso 11, 2020, si Westbrook nag-average og 27.5 puntos, walo ka rebounds ug pito ka assists, mga numero nga maghatag og labad sa ulo sa Rockets kon dili makaduwa ang 2017 NBA MVP.
Ang nahitabo kang Westbrook nakahatag og kabalaka dili lang sa Rockets kon dili hasta sa ubang teams.
“I’m praying for his safety and the same for his family,” matod ni Phoenix Suns guard Devin Booker. “Hopefully he can get healthy and get down here as soon as possible.”
Gikan niadtong Hulyo 1, 2020 dihang gisugdan ang pag-test sa mga magduduwa sa NBA, 19 na ang nahutang positibo sa Covid-19.
Gikan sa pag-abot sa mga magduduwa sa Walt Disney World Resort, duha lang sa 322 ka mga magduduwa nga gipaubos sa testing ang nasutang positibo sa Covid-19.
“All we can do is try to stay optimistic about it and positive, and hopefully we can finish this season,” matod ni Los Angeles Clippers forward Kawhi Leonard, kinsa maoy reigning NBA Finals MVP.
Grabe ka estrikto ang NBA sa pagpatuman sa health protocols sa tanang mga magduduwa, officials ug ubang mga sakop sa matag team.
Ang NBA daan nang miingon nga posibeng hingpit nilang kanselahon ang season kon magkadaghan ang mga matakdan sa Covid-19 sulod sa Walt Disney World Resoort World. (ESL)