DEAR Papa Joe,
Ako diay si Mary Anne, taga Naga, Cebu. 19 years old ang akong edad.
Naka relasyon na ko before, mga schoolmate nako sa una pero wa ko makauyon kay binata ra. Sukad pag ECQ sa Cebu, siyempre stay at home ko ug ang nahitabo sige na lang og atubang sa cellphone, sige na lang og Facebook hangtod nga nakaila nako si Jed nga maguwang kaayo nako kay 35 anyos na siya ug sweet kaayo siya nako. Iya gyud ko padad-an og pagkaon pahatud ug kanang magmotor. Di lang nako isulti.
Karon nahibaw-an sa akong parents. Nasuko sila nako kay maguwang lagi nako kaayo. Pero nakagusto na baya ko niya. Unsa may buhaton ko? Palihug tambagi ko.
MARY ANNE
Mary Anne,
Bata pa tuod ka ug basin nadala lang ka sa kalaay nga naa permi sa balay, unya sa kalit lang naay nagpakita nimo og importansya nga wa kaayo nimo makita sa ubang tawo siguro.
Ayaw lang sa padala sa emosyon kay bata pa lagi ka. Wa ka masayud nga basin minyo ba ron nang tawhana sa tinuod.
Para nako di man babag ang edad as long as tinud-anay na gyud na ug nagkakita gyud mo. Huwat lang siguro nga mahuman ni tanan ug makapamisita siya nimo.
Papa Joe
(sa inyong tampo ipadala sa papajoesuperb@gmail.com)