PARA nako, ang Cebu City ipaubos na sa general community quarantine (GCQ) sugod ugma, Hulyo 16.
Akong gibasihan ang paglibkas sa hard lockdown sa lima ka mga barangay sa dakbayan nga giilang epicenters sa Covid-19.
Nagpasabot nga nagkagamay ang kaso sa Covid-19 sa naasoyng mga barangay. Daghan usab ang naayo ug ang katawhan nakita nga misunod sa protocol.
Ug karong gabii pa, Hulyo 15, ipahibawo ni Presidente Rodrigo Duterte kon gikinahanglan ba nga ipaubos na sa GCQ ang siyudad sa Sugbo.
Sa probinsya sa Sugbo, ubos na sa modified general community quarantine (MGCQ). Hinayhinay na ang pagbangon human milukapa ang ekonomiya.
Samtang ang lungsod sa Boljoon ubos ni Mayor Merlou Derama, libre na sa Covid-19 tungod sa hugot nga kampanya ug pagsunod sa katawhan sa protocol.
Matud sa usa ka konsehal nga mihatag kanako og kasayuran, ang mayor ehemplo sa kakugi ug mangunay sa pagluto sa pagkaon sa ilang frontliners.
Buntag ug gabii ang pagbisita ni Derama sa 11 ka mga barangay sa lungsod ug mga utlanan sa kasilinganang lungsod aron makakuha og kasayuran labot sa Covid-19.
Duha sab ka higayon napaubos si Derama sa home quarantine tungod kay expose siya sa publiko apan, wala mahimong positibo sa Covid-19.
TUOB KITS
Nagkagubot ug wa magkadimao ang pamahayag sa mga tawong nakontrobersya sa pagpalit og tuob kits.
Maayo kay nakadesisyon si Mayor Edgardo Labella alang sa pagpahigayon ug imbestigasyon sa kontrobersya.
Kon imong sabton, wa i-tolerate ni Labella ang korapsiyon sa City Hall. Gusto sa mayor ang ligdong nga panggobiyerno.
Kini human mikisikisi si Labella ug nagkanayon nga way gipirmahan sa pagpalit og tuob kits ang iyang buhatan.
Mao sab ang pamahayag ni Bise Mayor Mike Rama, presiding officer sa konseho, nga way naaprobahan nga resolusyon sa paggahin og budget alang sa pagpalit og tuob kits nga mobalor tanan og P2.5 milyunes.
Si Konsehal Jerry Guardo, amahan o nag-advocate sa sa tuob kits, nitudlo kang Atty. Floro Casas nga maoy angay motubag sa pagpalit niini.