Editoryal: Pahibalo ni Duterte

(Editorial Cartoon by John Gilbert Manantan)
(Editorial Cartoon by John Gilbert Manantan)

KON WAY kausaban, gikatakda nga si Presidente Rodrigo Duterte moluwat na usab og opisyal nga pahibalo bahin sa status sa kuwarentina sa nagkalainlaing dapit sa nasod atol sa tigom sa Inter Agency Task Force (IATF) sa Malacanang karong gabii, Hulyo 15.

Sa dakbayan sa Sugbo, kulbahinam kon unsay hukom sa presidente. Ang dakbayan maoy bugtong dapit sa nasod nga gipaubos og balik sa enhanced community quarantine (ECQ) hinungdan sa kahigpit og balik sa polisiya ug lagda sa kuwarentina. Daghang miabag sa lokal nga kagamhanan aron kaminosan ang kaso sa Covid-19.

Ug kon si Mayor Edgardo Labella ang pasultihon, malaumon siya nga mapaubos ang dakbayan sa general community quarantine tungod sa kalamboan sa kampanya batok sa Covid-19. Gilibkas na ang hard lockdown sa lima ka mga barangay sa dakbayan nga epicenters sa virus.

Kini nagpasabot nga nagkagamay ang kaso sa Covid-19 sa maong mga barangay o sityo. Daghang naayo ug minos ang patay. Ang katawhan nakita nga misunod sa protocol sa maayong panglawas.

Dugang panglantaw, dili na usab seguro makasugakod ang dakbayan kon magpadayon ang ECQ human sa posible nga pagkatikyaob sa lokal nga ekonomiya. Ang sektor sa pamatigayon seguradong mopiyait na. Nagpanikad na nga makaabli og balik sa ilang negosyo.

Nagkakusog usab ang yawyaw ug reklamo sa mga kabus nga naglisod sa ilang pagkaon matag adlaw. Sa nagkataas nga kuwarentina, ang lokal nga kagamhanan wala nay klaro sa ilang suporta o hinabang sa mga gipang-lockdown nga dapit.

Ang ipahibalo ni Duterte karon rekomendasyon sa IATF. Hinuon, nasayod kita nga paborable ang komentaryo sa IATF-Visayas sa pagpangulo ni Secretary Roy Cimatu sa Department of Environment and Natural Resources (DENR) bahin sa kalamboan sa kaso sa Covid-19 sa dakbayan sa Sugbo.

Good luck natong tanan.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph