SAMTANG nagsaka ang mga kaso coronavirus infections, ang Department of Health (DOH) sa Martes sa Hulyo 14, 2020, niawhag sa mga ospital sa pagtuman sa 30 porsyento nga gahin alang sa posible, gisuspetsahan o kompirmadong mga kaso sa coronavirus disease (Covid-19) patients.
Si DOH Undersecretary Maria Rosario Vergeire nanawagan niini human ang 12 ka mga ospital sa Luzon nideklarar nga puno na ang ilang Covid-19 beds.
Sa mga alas 4 sa Martes sa hapon, ang DOH case bulletin nipakita nga ang nataptan sa Covid-19 niabot na og 57,545, nga naglakip sa 634 ka bag-ong mga kaso. Ang aktibong mga kaso nisaka ngadto sa 35,483. Ang ahensya niingon nga dunay 95 ka duplicates nga ilang gitangtang gikan sa kinatibuk-ang gidaghanon sa mga kaso.
Ang ahensya nitaho usab og 88 ka recoveries, kun kinatibuk-ang 20, 459 ug unom ang namatay, nga nidala sa kinatibuk-ang nangamatay ngadto sa 1,603.
Sa unom nga nangamatay, upat nahitabo sa Hulyo ug duha sa Hunyo. Tulo gikan sa National Capital Region, duha sa Central Visayas ug usa gikan sa Bicol.
Sa iyang regular nga virtual press conference sa Martes, si Vergeire niingon nga dunay 1,312 ka mga ospital ug 608 ka infirmaries sa nasod, nga dunay kinatibuk-ang 107,508 beds.
Kini naglakip sa wards, intensive care units (ICU) ug isolation rooms.
Ning kinatibuk-ang gidaghanon, si Vergeire niingon nga 14,945 lang (mga 14 porsyento) ang gigahin alang sa moderately, grabe ug kritikal nga mga pasyente sa Covid-19.
Ubos sa DOH Administrative Order 2020-0016, nga nagmando sa tanang mga ospital sa paggahin og 30 porsyento sa ilang kapasidad ngadto sa mga pasyente sa Covid-19, naa untay 32,252 Covid-19 beds. (MVI, SunStar Philippines)