GIPANGHINGUSGAN sa Mandaue City Health Office (MCHO) ang pagpanghatag og bakuna sa flu ug pneumonia labi na ngadto sa mga frontliner ug mga senior citizen karon sa panahon sa pandemya.
Bisan og naandan na sa MCHO ang pagpanghatag sa flu ug pneumonia nga bakuna matag tuig, mas gihingusgan kini tungod sa pagkatap sa coronavirus disease (Covid-19)
Matod ni Thelma Suico, head nurse sa MCHO, nga sukad pa niadtong miaging semana, miadto sa ilang opisina ang mga kawani sa gobyerno sa dakbayan sa Mandaue aron magpabakuna.
Matod ni Suico nga mas daghan na ang nagpabakuna karong panahon sa pandemya kay sa sa mga milabayng tuig.
Sa miaging tuig daghang sobra nga bakuna ug tungod ma-expire kini sa January, gipanghagad na kini nila sa mga empleyado sa usa ka mall sa dakbayan aron mahurot kay sa malabay.
Gipasabot sab ni Suico nga ang bakuna libre lang.
Karon, nakadawat ang MCHO gikan sa Departmentof Health (DOH) Central Visayas og 576 ka vials sa bakuna sa flu nga makabakuna og 5,760 ka mga tawo.
Samtang sa pneumonia, napadad-an sila og 400 ka vials nga makabakuna og 400.
Sigon ni Suico nga ang hinungdan nga gamay lang ang alang sa pneumonia tungod kay molanat kini og lima ka tuig ug alang sa mga senior citizens, molanat og dugay.
Adunay mga nagpabakuna nga flu lang ang gikuha tungod kay nakapakabakuna na sila sa miaging mga tuig.
Samtang, ang bakuna sa flu molanat og usa ka tuig lang.
Kadtong mga kawani sab sa barangay, nahatdan sila sa maong mga bakuna aron sila na ang mubakuna sa mga frontliner sa dakbayan ug mga lumulupyo, labi na ang mga senior citizen.
Ang mga barangay nga wa pa mokuha sa ilang mga bakuna mao ang Alang-Alang, Cabancalan ug Jagobiao.
Di man kini makaayo sa sakit nga Covid-19, apan sigon ni Suico nga maayo nalang nga adunay proteksyon ang katawhan labi na nga ang mga simtomas sa Covid-19 susama sa flu ug ang uban nangamatay sa pneumonia. (KFD)