MOLAPAS sa 200 na ka mga piniriso sa Mandaue City Jail (MCJ) ang nakarekober sa coronavirus disease (Covid-19) samtang duha nalang ka piniriso ang nagpabiling positibo sa maong sakit.
Matod ni Jail Superintendent Gil Inopia, jail warden sa MCJ, nga ang duha ka mga piniriso nga wa pa makarekober sa Covid-19 anaa gihapon sa ilang quarantine facility sa Barangay Basak, Mandaue City.
Dugang niya nga ang mga nakarekober 21 na ka adlaw nga way gipamati nga mga simtomas nga susama sa trangkaso. Ang uban kanila gibalik na sa ilang jail facility sa Barangay Looc.
Sigon ni Inopia nga bisan og nakarekober na ang mga piniriso, wa dayon kini nila gisagol sa ubang mga piniriso nga wa matapti sa sakit.
Sa panahon nga magnegatibo na sa sakit ang piniriso, ibalhin dayon sa ilang pasilidad sa Barangay Looc, apan ibutang una sa isolation cells sulod sa maong pasilidad og 14 ka adlaw.
Human sa 14 ka adlaw nga pag-isolate, kon wala na kini gipamati, isagol na ngadto sa ubang mga piniriso nga wa matapti sa maong sakit. Katunga pa sa gidaghanon sa nakarekober ang nabalhin balik sa pasilidad nila sa Barangay Looc.
Sa mga miaging buwan, kinabag-an sa mga kaso sa Covid-19 sa dakbayan naggikan sa MCJ, apan karon halos tanan kanila naayo na.
Matod ni Inopia nga ang estratehiya lang nila nga kon adunay magpositibo, ibalhin dayon sa isolation center sa Barangay Basak.
Didto sa maong pasilidad, hamugaway ang mga piniriso tungod kay dako ang hawan ug matuman ang social distancing, di sama sa pasilidad sa Looc.
Dugang ni Inopia nga bisan way habol ang mga piniriso, mag-steam inhalation gihapon sila samtang gi-isolate, ug mag ehersisyo sab aron palig-on sa ilang resistensya.
WA PAY DALAW
Bisan paman og hapit na makarekober ang tanan mga piniriso, padayon gihapon ang pagsuspenso sa dalaw.
Gani padayon sab nga gi-lockdown ang mga jail officer sulod sa Mandaue City Jail ug ang mga kawani nga anaa sa gawas sa ilang parameter lang ang mohatod og mga kinahanglanon sa sulod sa prisohan.
Sa laing bahin, adunay natala nga 200 kapin ka mga positibong kaso, diin duha nalang ang aktibo nga kaso samtang usa ka piniriso ang patay.
Sa mga jail officer, usa lang ang nataptan sa maong virus niadtong Mayo ug nibalik na sa serbisyo niadtong Hunyo. (KFD)