USA ka buwan gikan sa pagpatuman sa bike lanes sa Mandaue City adunay 50 ka mga motorista ang nakalapas sa paggamit niini.
Samtang andam na ang Cebu City Transportation Office (CCTO) sa pag-implementar sa bike lanes sa nanag-unang dalan sa dakbayan.
Ang operations chief sa Traffic Enforcement Agency of Mandaue (Team), Arnol Malig-on nagkanayon nga sagad sa mga naka-violate sa bike lane mao kadtong motorista nga mo-park diha sa designated bike lanes.
Adunay15 ka mga nag-illegal parking sa bike lanes ang gipang-clamp sa Team.
Laing mga nakalapas mao kadtong mga nagmotorsiklo nga mosubay sa bike lanes diin adunay 20 ka mga violators ang nakamulta sud sa ka buwan nga operasyon.
Adunay multa nga P1,000 alang sa illegal parking samtang P500 alang niadtong motorsiklo nga mogamit sa bike lanes.
Gipasabot ni Malig-on nga ang bike lanes eksklusibo alang sa mga magbisikleta.
Sigon pa sa opisyal nga wala pa silay nataho nga insidente nga adunay nagbisikleta nga nadisgrasya sa bike lanes.
Sagad nalang nga madisgrasya kadtong mga magbisikleta nga mulabang sa interseksyon bisan og stop.
Sa habig sa dakbayan sa Sugbo, ang pangulo sa CCTO, Alma Barandog-Casimero, nga natapos na nila sa pag-inspect ang Osmeña Boulevard ug N. Bacalso Avenue nga maoy ilang gitan-aw nga maoy unang butangan og bike lanes.
Gawas niini, unang gikonsidera sa Sugbo Bike Lane Board ang pagbutang usab og agianan para sa mga buseklita gikan sa V.Rama avenue, B. Rodriguez, General Maxilom avenue, MJ Cuenco avenue lahos sa Plaza Independencia.
Giangkon ni Casimero nga adunay mga dalan sa Cebu City nga dili haom butangan og bike lanes sanglit one lane o two lanes lang ang karsada ug apeki na sa espasyo kon butangan pa kini og dedicated lane para sa biseklita.
Dugang sa pangulo sa CCTO nga nag-andam na usab sila og mga signage ug gihikay na ang mga gikinahanglan para pagpalit og mga materialis sama sa pintal ug uban pa panginahanglan. (PAC)