APROBADO sa Inter-Agency Task Force for Emerging and Infectious Disease (IATF-EID) ang Anti-Covid Motorcycle Passenger Shield alang sa Angkas.
Matod pa ni George Royeca, chief transports advocate sa Angkas nga makig-alayon sila sa kagamhanan aron nga pabiling luwas ang ilang mga pasahero batok sa Covid samtang luwan sa Angkas.
“We thank Sec. Lorenzana, Sec. Año, Sec. Galvez, Sec. Dizon, the IATF, and the NTF for the swift action and decisiveness on public transport safety. The responsiveness that you have shown especially during this pandemic is a great service to the Filipino people,” tipik sa pamahayag ni Royeca.
Ang maong backpack style nga motorcycle shield sigun sa iyang gilapdon, porma ug ang special features niini makapugong sa pagtinakdanay sa virus tali sa drayber ug pasahero.
Ang matang sa plastik nga gigamit sa maong shield sayon ra sab sa pag-disinfect ug makaklaro gihapon ang pasahero sa iyang pagtan-aw tan-aw samtang nag-angkas.
Luwas usab gamiton ang shield kay lig-on ang matang sa plastic sheet nga dili daling mabuak ug matipak sa higayon nga makasugat og kusog nga impact.
Dili sab makasinate og pagkasaray-saray sa higayon nga magdagan ang motorsiklo gumikan sa iyang porma nga “back-swept flaps” nga dili makabalda ang gikusgan sa pagpadagan sa unit.
Gawas nga klaro ang material sa plastic nga gigamit gaan sab kining dad-on, samtang komportable ang pasahero sa iyang pag-angkas kay way ali ang dapit sa paa sa ila unyang paglingkod.
“Materials and design make it easy to produce at low costs by many manufacturers to make it accessible to most Filipinos,” tipik sa press statement sa Angkas. (JOB, FVQ)