NAG-ABOT-ABOT ang mga hinabang nga nadawat sa Cebu City Government nga magamit sa mga Sugboanon panahon niining kalisod ingon man mga gamit alang sa mga frontliner sa pagpakigbatok sa Covid-19.
Si Senador Sherwin Gatchalian nga miduaw sa siyudad para itunol ang kapin P2 milyones nga balor sa donasyon ngadto ni Cebu City Mayor Edgardo Labella.
Lakip sa donasyon ni Gatchalian ug sa iyang pamilya mao ang 600 ka sakong bugas sa tag- 50 kilos, 20,000 ka de lata, 50,000 packs nga noodles ug 100,000 ka surgical masks.
“Makakaasa ang taong-bayan na patuloy kaming tutulong sa abot ng aming makakaya, sa kahit saan mang sulok ng Pilipinas. Kaisa kami sa laban na ito,” tipik sa pamahayag ni Gatchalian.
Ang pundo nga gigamit sa senador gikan sa iyang kaugalingon nga bulsa ug dili gikan sa iyang buhatan.
Gawas kang Gatchalian, nakadawat usab og ayuda ang City Government gikan sa pribadong panudlanan ni Senator Bong Go.
Si Go mitunol og 300 ka pack meals ug 300 ka hygiene kits alang sa mga pasyente nga naa karon sa Cebu City Quarantine Center ug NOAH Complex.
Laing tabang ang nadawat sa siyudad niadtong Hulyo 13 gikan sa House of Representatives.
Si Deputy Speaker Pablo John Garcia maoy personal nga nihatod isip representante ni House Speaker Allan Peter Cayetano ngadto kang Labella sa 2,000 sets sa PPE, 200 pieces nga non-contact infrared forehead thermometer, 10 units Lenovo laptop, 200 boxes vitamins C, 50 packs sa Ziplock ug P1 milyon nga tseke. (PAC)