KINAHANGLAN gayod nga mosunod sa mga safety protocols aron dili na motaas ang kaso sa coronavirus disease (Covid-19) sa Davao City.
Sumala ni Davao City Mayor Sara Duterte-Carpio sa 87.5 dcDR FM kagahapon nga aron di mabalik sa ECQ ug GCQ, kinahanglan ang pagsunod sa mga safety protocols kini human nga ang siyudad ning adlawa, lagmit nga mapailawom og balik sa General Community Quarantine (GCQ).
"Dili nato gusto mobalik og GCQ pero maghulat ta sa official announcement from IATF kung unsa atong quarantine status. Unsaon man para dili ta mabalik
og ECQ or GCQ? Kinahanglan mag-slowdown atong transmission maong kinahanglan I follow nato ang safety protocols," ingon ni Mayor Sara.
Una niini, giunhan sa mayor og pahibalo ang publiko nga dunay dako nga purohan nga mabalik sa GCQ ang siyudad karong adlawa, Huwebes, Hulyo 16.
Nasayran nga kagahapong adlawa, Hulyo 15, 2020, ang katapusan sa modified GCQ human gipailawom ang siyudad niini gikan sa usa ka bulan nga GCQ.
Giingon sa mayor nga mipasiuna na og butyag ang Inter-Agency Task Force for the Management of Emerging Infectious Diseases (IATF-EID) nga ang siyudad ibalik kini sa pagpailawom sa GCQ.
Apan suma sab sa mayor nga maningkamot ang dakbayan nga moapela sa IATF nga mapabilin gihapon ang dakbayan sa GCQ.
Kini ang paningkamot karon sa lokal nga kagamhanan ning Dakbayan nga di na mabalik ang siyudad sa GCQ, gumikan gitan-aw niini ang tumang panginahanglanon sa katawhan.
Mabalik man sa GCQ ug magpabilin gihapon sa MGCQ, ang pinaka-importante ang pagtuman gayod sa mga safety protocols aron hingpit nang mapukan ang kalaban nga di makita.