NAMILEGRO karon ang Agdao sa Davao City nga lagmit matigayon ang hard lockdown sa barangay nga anaa sa palibot sa maong dapit gumikan sa padayon pagtaas sa kaso sa coronavirus disease (Covid-19).
Kini ang gibutyag ni Davao City Mayor Sara Duterte-Carpio atol sa radio program niini kagahapon sa 87.5 FM dcDR.
Sumala sa mayor nga nagpadayon pa ang diskusyon kung ipatuman ba ang hard lockdown sa maong dapit sama sa natigayon sa Barangay 23-C, Poblacion.
"Increasing ang cases sa Agdao pero so far, murag maagapan man. Pero ongoing ang discussion if i-hard lockdown ba didto," ingon ni Duterte-Carpio.
Kahinumdoman nga sa wala pa gipaubos sa hard lockdown ang Barangay 23-C sa Isla Verde, misutoy sab ang kaso sa Covid-19 sa Barangay Leon Garcia, Agdao District.
Una nang mipahigayon og purok lockdown niadtong enhanced community quarantine (ECQ) ang Barangay Leon Garcia ingon man ang Barangay 21-C gumikan sa natala nga kaso sa Covid-19.
Hinuon sa maong pagkaagi, gilayon sab nga gipangdala sa isolation facility ang mga suspected cases ug hilayong gipa-home quarantine ang mga miyembro sa pamilya.
Sa nahiunang pamahayag ni Barangay Leon Garcia Kapitan Lita Empis, makuti nga checkpoint ang gilayon nilang gipatuman sa ilang barangay dihang natala ang sunod-sunod nga kaso sa Barangay Leon Garcia.
Hinuon ning kasamtangan, suma sa mayor nga mora'g madala pa ang kaso sa Covid-19 sa Agdao diin di susama sa ubang barangay sama Isla Verde nga taas kaayo ang kaso sa matag adlaw sa wala pa kini ma-hard lockdown.
Ang Agdao District gilangkuban sa mga barangay sa Agdao Proper, Tomas Monteverde Sr., Leon Garcia, San Antonio, Paciano Bangoy, Wilfredo Aquino, Gov. Vicente Duterte, Centro, Ubalde, R. Castillo, ug Lapu-Lapu.
Hinuon, wala gitumbok sa mayor unsang barangay sa Agdao District ang lagmit nga mapaubos sa hard lockdown kung magpadayon ang pagtaas sa kaso sa Covid-19.