SUPERBALITA CEBU

Pamultahon ang PBA players nga makasupak sa health protocol

GIPAHIMANGNUAN sa Philippine Basketball Association (PBA) ang tanan nilang mga magduduwa nga mopahamtang sila og multa sa mga makasupak sa health protocols nga ipatuman sa liga sa higayon nga makabalik na og praktis ang ilang miyembrong teams.

Gipasabot ni Commissioner Willie Marcial nga usa sa labing mahinungdanong lagda nga ilang ipatuman naglambigit sa mga lakaw sa mga magduduwa ning panahon sa pandemya.

“Ang players dapat bahay, sasakyan, gym. So dapat huwag kang aalis,” pasabot ni Marcial.

Kon dili malikayan nga kinahanglang mogawas ang usa ka magduduwa, kinahanglan nilang pahibaw-on ang liga niini.

Sa premirong pagsupak ning maong lagda, ang magduduwa pamultahon og P5,000 unya magkadako ang multa sa magsunod nga mga salaod.

Mopahamtang sab ang PBA og labing ubos P20,000 nga multa sa mga mosupak sa lagda atol sa pagpraktis sa team.

Sa laing bahim, gikuwestiyon sa PBA ang Blackwater Elite kon nganong nag-una-una kini sa pagpahigayon og praktis alang sa pagbalik sa aksyon sa liga.

Gitugtan na man tuod sa gobiyerno ang PBA nga makapahigayon og praktis apan kinahanglang magsubay ang tanang teams sa health protocols nga ipatuman sa liga ug Department of Health.

Apan giklaro ni Marcial nga wala pa sila mihatag og pagtugot ngadto sa tanan nilang miyembrong teams aron makapraktis.

Ning panahuna, gidili pa gihapon ang pagpahigayon og 5-on-5 basketball. (ESL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph