NAGKAKUYAW ang abilidad ni Talk N’ Text KaTropa guard Roger Pogoy sulod sa duha ka mga tuig niyang pagduwa sa Gilas Pilipinas ug mismong ang International Basketball Federation (Fiba) nakabantay niini.
Tungod niini, gilakip sa Fiba ang lumad nga taga Talisay City, Cebu sa ilang listahan sa “most improve players” gikan sa Asia Cup 2017 hangtod na sa Asia Cup 2021 qualifiers.
Niadtong 2017, si Pogoy nag-average lang og 7.0 puntos ug 3.5 rebounds sa 16.7 ka mga minutos nga playing time.
Niadtong 2019, ang produkto sa University of Cebu (UC) Baby Webmasters, nahimo nang usa sa labing sinaligan sa Gilas Pilipinas.
Sa dakong kadaugan sa Gilas Pilipinas batok sa Indonesia, 100-70, sa sayong bahin ning tuiga sa Asia Cup 2021 qualifier, si Pogoy nagpauwan og 16 puntos ug unom ka rebound sulod lang sa 23 ka mga minutos nga pagduwa.
Sa labing ulahi niyang pagduaw sa isip pinasidunggang dinapit sa “2OT” program, gibutyag ni Pogoy ang proseso nga iyang gisubay aron mahashasan pa’g samot ang iyang abilidad.
Gikan sa Cebu, si Pogoy milarga sa Manila aron moduwa sa Far Eastern University (FEU) Tamaraws sa iyang pagpatong sa kolehiyo.
“Ang daming nagsasabi sa akin na sa Cebu lang daw ako magaling, kasi noong unang punta ko sa FEU, di kaagad ako gamit. Tapos sa Cebu, noong high school ako, MVP ako. Parang sabi nila, ‘Ah sa Cebu lang ‘yan magaling’,” matod ni Pogoy.
“Ilang years ako nagtiis rin sa FEU, kasi pasundot-sundot lang ‘yung pasok ko. Tiis saka sipag lang talaga.”
Niabot ang panahon nga nahimo na siyang sinaligan sa Tamaraws nga iyang giagak ngadto sa UAAP title niadtong 2015.
Nahimo sab si Pogoy nga 2017 Rookie of the Year awardee ug 3-time All-Star sa Philippine Basketball Association (PBA). (ESL)