Tambagi ko Noy Kulas: Covid o naay lain?

DEAR Noy Kulas,

Maayong adlaw. Tawga lang ko sa ngan nga Empoy, taga probinsya sa Cebu.

Ang akong problema kabahin sa akong asawa nga toa sa Negros natanggong kay nibakasyon aron unta mamista sa ilaha. Wa na siya makabalik since first week sa March diri sa Cebu. Ako na unta siyang gipapauli pero nahadlok siya kay daghan na kuno og gi-coronavirus diri sa atoa. Bisan giunsa na nako og hangyo nga mouli kay nangita na ang among mga anak, di gihapon siya mopauli kay lagi mahadlok pa kuno siya.

Ang last namong estorya sa phone nakapalibog nako kay samtang nag estorya mi, dunay tingog sa lalake nga nasuko nga naa siya kaestorya sa phone ug giilog dayon gipawong. Sukad ato di na siya ma contact. Nagduda na hinuon ko nga naa na siyay lain didto. Ang iyang pamilya ni-deny but di sila makapugos og paestorya niya. Maglikay ba sila kon mangita na ko niya.

Ikaw, Noy Kulas, unsa may imong huna-huna? Kon asawa ug inahan pa siya nga tarong, di unta siya mahadlok nga mouli kay unsa ra gud nang kagawa ba. Iyang gisakripisyo ang among pamilya tungod ra sa kahadlok.

EMPOY

Empoy,

Kadto hinuon medyo bug-at nga rason nganong magduda ka nga duna na siyay laing lalake didto. Lain sab kaayong makadungog ka nga mao-mao lang to o drama ra nila. There is something nga nagpaluyo sa imong nadunggan. Dungagan pa sa pagkaputol na sa inyong communication ug paglihaylihay sa iyang pamilya sa imong mga pangutana kabahin niya. Kay kon wa pay mga kakulian niya didto, magkaestorya na unta mo parte niya. Apan duna man tingali sila gitagoan, mao nang lihay kaayo.

Kon maayo na ang tanan unya di gihapon siya mopauli, kana maorag magkompirmar sa imong pagduda. But mas maayong molarga ka ngadto nga di magpahibawo aron imong makita kon unsa ang tinud-anay niyang sitwasyon. Kon unsa man ang imong makita puhon, be ready sa bisan unsa. Ayaw lang paglarga nga ikaw ra alang usab sa imong kasegurohan ug dunay tawo nga mopakalma kanimo kon dunay di maayong kalambuan didto.

Pagkakaron, pag-ampo nga unta ang tanan di tinuod ug lamdagan siya aron mopauli na sa inyoha kon tinuod man nga igo ra siyang nahadlok sa Covid.

NOY KULAS

rojval69@yahoo.com ug kulassuper@sunstar.com.ph

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph