JOJIE E. OGA-OB
Barili, Cebu
Dili malilong kon unsay naa sa atong sulod.
Sama sa aso kini moalimbukad gayud
Sama sa tubig kini mangitag kadagaydayan.
Kon ang atong dughan tingpanglarag
Atong dila mahimong dahon nga laya
Atong kalimutaw itom nga linaw
Atong pulong patayng moalisngaw
Gikan sa nagpundok nga kalabera
Sa sam-ang sa atong dughan.
Apan kon kita anaa usab sa berano
Nga kahimtang matataw ang kagilaw
Sa atong mga mata, ang pagpamukhad
Sa mga gihay sa atong pahiyom
Ang kasanag sa atong panagway
Ang kinabuhi sa atong gininhawa