BISAN sa pandemiya sa Covid-19 sa tibuok kalibutan, padayon ang pagbantay sa Bureau of Fisheries and Aquatic Resources (BFAR) 7 niining mga illegal nga aktibidad sa pagpangisda sa rehiyon.
Biyernes, Hulyo 10, dihang nasikop sa BFAR 7 inabagan sa Philippine National Police - Maritime Group ang usa ka commercial vessel sa kadagatan sa lungsod sa Sta. Fe.
Nasikop ang kapitan ug ang lima ka tripolante nga nangisda sa gidili nga dapit ingon man nigamit kini og palakaya nga dili pwede sa kadagatan sa mga lungsod.
Ang kapitan sa maong commercial vessel naila nga si Nilo Casipong, nasayran nga gikan sa Negros Occidental ang maong grupo.
Base sa Republic Act 8550, ginadili ang pagpangisda sulod sa 15 kilometros gikan sa baybayon sa munisipyo alang sa commercial fishing vessels.
“Municipal fishing is concentrated within an area extending 15 km from the shoreline while commercial fishing takes place beyond the 15 km limit as defined by the Philippine Fisheries Code of 1998,” dason niya nga ang gipasakaan na kini og kaso sa Cebu Provincial Prosecutor’s Office ug sa Adjudication Committe sa BFAR 7.
Gawas nga naatlan ang maong mga mananagat nga nanagat sa gidili nga dapit, nigamit usab kini og palakaya nga usa ka fishing gear nga dili pwede sa kadagatan sa munisipyo.
Nasayran usab nga wala’y lisensiya ang tripolante niini.
Mag-atubang og parehong kasong kriminal ug administratibo ang mga nadakpan ubos sa Sections 86 ug 95 sa Republic Act 8550 (Philippine Fisheries Code of 1998) nga giamyendahan sa Republic Act 10654, o ang nagpugong niining illegal, unreported ug unregulated nga pagpangisda. (HBL)