GIBUTYAG ni Konsehal Flaviano Hiyas, ang majority floor leader sa konseho sa dakbayan sa Lapu-Lapu, nga aprobado na ang gahin nga kinahanglanon sa kagamhanan alang alang sa pagpang-apud-apod og food packs sa mga Oponganon nga mapaubos unya sa lockdown o home isolation.
Nalatid kining maong pundo sa ilang giuyonang annual investment plan (AIP) sa konseho.
Nigahon og P6 milyunes subay sa gipangayo sa kagamhanan ubos ni Mayor Junard Chan alang sa maong katuyoan.
Pamahaw, paniudto ug panihapon ang ihatag sa kagamhanan sa matag pamilya unya sa ma-lockdown o i-isolate nga dapit.
Kini aron masiguro nga motuman gayud sa lagda ang mapaubos sa lockdown o home isolation nga dili mogawas aron mangita og pagkaon o motrabaho.
Sa usa ka panimalay nga ipaubos sa lockdown o home isolation mao kadtong adunay mga nagpuyo nga may simtomas sa coronavirus disease (Covid-19) nga gikatakdang obserbaran ug ipaubos sa swab test sa taga City Health Office.
“Kay kani sila gud ug di nato ma lockdown di nato ma providan ug pagkaon mogawas gyud unya manakod na didto sa gawas inkaso kay motrabaho man,” pagpasabot ni Hiyas.
Laing nalakip sa AIP nga giaprobahan sa konseho mao usab ang pagpamalit sa kagamhanan ug mga ventilators alang sa mga tambalanan sa dakbayan diin nagpaalim karon ang mga pasyente sa Covid-19.
Depende unya sa panginahanglanon niini ang mga ventilators mahimo usab nga ipahimutang sa isolation center sa dakbayan hilabi na kun mograbe usab ang masulod sa mga pasilidad sa mosunod mga semana.
Kining tanan gibutyag ni Hiyas ilang ilakip sa umaabot supplemental budget nga tukion sa konseho karon, Hulyo 16, atol sa ilang regular session sa konseho. (GCM)