MASALIGON na si Cebu City Councilor Joel Garganera, bag-ong gitudlo nga Deputy Chief Implementer sa Inter-Agency Task Force (IATF) Emergency Operations Center (EOC) sa Cebu City, nga mapaspas na ang contact tracing sa mga tawo nga dunay contact sa mga positibo sa coronavirus disease (Covid-19) sa Dakbayan sa Sugbo.
Sa interbyu sa Superbalita Cebu, si Garganera nibutyag nga gipilo nag ka 10 ang gidaghanon sa contact tracing teams sa Dakbayan sa Sugbo kon itandi niadtong Abril.
Matod niya nga lima lang ka tracing teams ang giumol sa Siyudad sa Sugbo niadtong Abril apan karon duna nay 50.
Apan human sa pag-anhi ni Baguio City Mayor Benjamin Magalong mga usa ka semana ang nakalabay alang sa contact tracing training, ang Siyudad, ubos sa pag-abag sa Police Regional Office (PRO) 7, nakaumol na og 49 ka tracing teams.
Sa Miyerkules, Hulyo 15, 2020, dunay ginsay nga 39 ka pulis, 37 ka Bureau of Fire Protection (BFP) personnel ug 50 ka job order nga kawani.
Matod niya nga madugang kini sa tracing teams, nga ilang target nga makaumol og 130.
“We have teamed up with the Philippine National Police and the Armed Oorces inorder to comprehensively help is contact tracing. These uniformed personnel had already been trained as contact tracers,” butyag ni Garganera.
NAKASUGOD NA
Kapin na sa 900 na ka mga indibidwal ang nasubay sa contact tracing teams nga giumol sa Kagamhanan sa Dakbayan sa Sugbo ug PRO 7 sukad gisugdan ang pagpangita sa mga tawo nga adunay close contact sa mga nagpositibo sa Covid-19.
Sa uwahing ihap sa PRO 7, miabot na sa 909 ka mga indibidwal ang nasubay. Matod ni Police Brigadier General Albert Ignatius Ferro, pangu sa PRO 7, nga kuwang pa kini.
“I think what I saw last night (Martes) gamay lang siya, 900 something pa lang siya. We have to work more and the added personnel will help us come up with the additional output para atong ma polish yung ang atung pag contact tracing,” matod ni Ferro. (AYB, REV)