SUPERBALITA CEBU

Officials sa 2 ka barangay gikiha

GIPASAKAAN na og kaso sa Criminal Investigation and Detection Group (CIDG) 7 ang mga opisyal sa duha ka mga barangay sa Dakbayan sa Sugbo kansang mga lumolupyo nakalapas sa mga lagda sa enhanced community quarantine (ECQ).

Si Assistant Secretary Alexander Macario sa Department of the Interior and Local Government ( DILG) maoy nibutyag niini atol sa media briefing sa Miyerkules, Hulyo 15, uban sa mga opisyal sa Inter Agency Task Force (IATF) Visayas sa Emergency Operation Center (EOC) sa Cebu City Government.

Ilang gikauban si Mayor Edgardo Labella, Konsehal Joel Garganera, retired Major General Melquaides Feliciano, chief implementer sa IATF-Visayas.

Wa gibutyag ni Macario kon kinsa nga barangay officials nga gikiha, unsa nga mga kaso ug kanus-a napasaka. Apan nakitang kalapasan sa DILG mao ang kapakyas sa mga barangay kapitan ug konseho sa pagpatuman sa quarantine protocol.

Laing duha ka mga opisyal sa barangay, kansang tubag sa show cause order sa DILG, gi-review sa CIDG 7, nga maoy gitahasan ni Presidente Rodrigo Duterte sa pagpasaka og kaso.

Si Atty. Ian Kenneth Lucero, pangulo sa DILG-Cebu City, nisulti sa Superbalita Cebu nga nakaabot na sa buhatan ni Interior Secretary Eduardo Año ang tubag sa siyam ka barangay sa show cause order, partikular sa mga punong barangay.

Karong adlawa, gipahibawo ni Lucero nga ilang ipadala ang electronic copy sa tubag sa show cause order batok sa kapitan sa Barangay Capitol Site ug Bulacao samtang ang hard copy ipaapas ra sa DILG Cebu City.

Ang laing mga barangay kansang mga opisyal gipadad-an og show order mao ang San Nicolas Proper, Cogon Pardo, Inayawan, Santo Niño, Calamba, Basak San Nicolas, Basak Pardo ug Guadalupe.

Si Lucero nagkanayon nga sagad sa kalapasan sa mga barangay opisyal base sa show cause mao ang kapakyas nila pagpatuman sa physical physical social distancing, way mask.

Dunay mga lumolupyo nga nagsugal ug nagsayawsayaw ang ilang mga residente.

Matod ni Macario nga mahinungdanon ang papel sa mga barangay kapitan.

“I would like to challenge our barangay captains. We really need your support. We serve the people with compassion in this time of pandemic. The mayor cannot do it alone,” matod ni Macario.

Samtang si Garganera niingon nga naa na nila ang suporta sa mga barangay kapitan.

Iyang gitumbok si Konsehal Franklin Ong, presidente sa ABC, nga aktibo sa pakigtambayayong kanila. Si Garganera niingon nga dunay representante ang ABC sa umulon nga Covid advisory council.

Tumong niini mao ang pagpahapsay sa tanang mga data gikan sa barangay, Siyudad ngadto na sa Department of Health (DOH) 7. Sa labing uwahing talaan sa DOH 7, niabot na og 7,589 ka mga kaso sa Cebu City, 3,142 mga aktibong kaso samtang 388 na ka mga kinabuhi ang nakalas.

Niabot na usab og 4,059 ang naka-recover sa Covid-19. (PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph