TUNGOD sa pagtaas sa ihap sa mga kaso sa coronavirus disease (Covid-19) sa Davao Region kung diin giingong nakatampo niini ang pag-abot sa mga locally stranded individuals (LSIs) ug overseas Filipinos (ROFs), mohangyo ang kagamhanang probinsiyal sa Davao de Oro ngadto sa nasudnong kagamhanan nga isuspende una ang Hatid Probinsya program sulod sa duha ka semana.
Niadtong Hulyo 15, gibutyag ni Davao de Oro Governor Jayvee Tyron Uy nga iyang irekomenda ang pagsuspende ngadto sa National Inter-Agency Task Force aron nga maluagan una ang ilang mga isolation units sa mga barangay ug munisipalidad sa nagguot nang ihap sa Covid-19 positive nga mga LSIs ug ROFs.
"Naay mga barangays nga puno na gyud. Maayo na lang nga ato sang ipa-recover sila para pod dili mabug-atan ang atong health system kay ang tigbantay pod sa barangay, bug-at na pod kaayo kung paspas ang pagdungag sa Hatid Probinsya program ang makaabot," pasabot sa gobernador.
Tin-aw niya nga mohimo pa og pamaagi ang health team sa probinsiya aron nga hapsayon ang isyu bahin sa pasilidad.
Sukad Hulyo 16, nitala na ang Davao de Oro og 13 ka bag-ong kaso sa Covid-19 kon diin 11 kanila mga LSIs gikan sa National Capital Region (NCR) ug Cebu City kon diin tanan kanila asymptomatic.
Ang nahabilin nga duha mao ang unang local transmissions.
Giawhag sab niya ang mga molupyo sa probinsiya nga kasamtangang natanggong sa ubang mga lugar sa nasud nga makig-koordinar uban sa local government units (LGUs) sa ilang pagbalik aron nga mapugngan ang pagtakod sa uban kung sila positibo sa Sars-Cov-2.
Niadtong Hulyo 15, gilugwayan sa IATF ang Modified General Community Quarantine (MGCQ) sa Davao de Oro, lakip na ang ubang mga probinsiya ug sa Davao City sa Davao Region gawas lang sa Davao Occidental nga gipaubos sa Low-Risk MGCQ. (Roberto A. Gumba Jr.)