GIPABUHAGAY sa mismong tag-iya sa Blackwater Elite nga si Dioceldo Sy nga ibaligya niya ang iyang prankisa sa Philippine Basketball Association (PBA) sa kantidad nga P150 million.
“I’m open to take on interested buyers,” matod ni Sy nga napatik sa Spin.ph. “I’m done with the PBA.”
Usa lang ba kaha kini ka reaksyon o nakaplano nang daan?
Gibutyag kini ni Sy usa ka adlaw human siya gipahimangnuan sa PBA kabahin sa ilang pagpahigayon og praktis bisan wala pa’y pagtugot sa liga.
Mitingog sab ang Games and Amusement Board (GAB) kabahin niini ug posible kining mopahamtang og silot sa Blackwater sa pagsupak niini sa health protocols nga gipatuman sa gobiyerno.
Si Sy, kinsa maoy tag-iya sa Ever Bilena Cosmetics, tiggama sa Blackwater cologne, miangkon nga napungot siya sa aksyon sa PBA apan wala kini miklaro kon aduna ba kini kalambigitan sa iyang kalit nga desisyon nga ibaligya ang iyang prankisa.
“There’s no big deal or issue. It’s a non-issue,” matod ni Sy.
Ang Blackwater usa sa duha ka expansion teams nga gidawat sa PBA niadtong 2014 nga nagbalor og P120 million ang matag usa.
Sa lima ka seasons, ang Blackwater nakataak sa playoffs sulod sa tulo ka mga higayon apan wala kini nakaabot sa quarter-final phase.
Ang desisyon ni Sy nasukwahi sa iyang gipadayag dihang mibisita siya isip pinasidunggang dinapit sa Sports Page program niadtong Lunes sa gabii, Hulyo 13, 2020/
“It’s a welcome news for everyone, PBA teams, PBA fans and us, team owners. We want to see the PBA get back in action as soon as possible to give fans and the people a sign of normalcy,” matod pa niya sa programa.
Apan ning maong programa ra sab naigo sa kontrobersya si Sy dihang iyang nahisgutan nga nakabisita siya sa praktis sa Blackwater niadtong Sabado, Hulyo 11, 2020.
Atol sa pagpraktis sa Blackwater, ang PBA wala pa mihatag og pagtugot sa tanang teams nga makapraktis bisan gitugtan na kini sa IATF (Inter-Agency Task Force on Emerging Infectious Diseases).
“No more reason to join the PBA whole heartedly. Time to say goodbye to the PBA soon,” dugang ni Sy.
Gipasabot ni Sy nga tibuok adlaw sa Miyerkules, Hulyo 15, 2020, naghunahuna siya og maayo una siya mibuhi og desisyon nga ibaligya niya ang iyang prankisa sa PBA.
“I’ve seriously soul-searched and nothing, it just popped up. I’m thinking of selling my PBA franchise,” pasabot niya.
Gitataw ni Sy nga plano niyang mobalik sa boksing diin makigtambayayong siya ni Senator Manny Pacquiao ug kanhi two-time world champion Gerry Peñalosa.
“Boxing na lang tayo,” matod ni Sy, kinsa usa mga ningtabang sa pagdumala ni Pacquiao kaniadto. (ESL)