Marcial mipirma na sa MP Promotions

PORMAL nang misulod sa professional rank ang 2021 Tokyo Olympic qualifier nga si Eumir Marcial.

Kagahapon, gipahibalo sa 2019 world championships silver medalist nga mipirma na siya og unom ka mga tuig nga kontrata sa (MP) Promotions nga gipanag-iya ni senator Manny Pacquiao, kinsa maoy bugtong 8-division world champion sa kalibutan.

Gipasabot ni Marcial nga sa kadaghan nga nagtanyag kaniya, napili niya ang MP Promotions gumikan kay andam kining mosuporta kaniya sa tiwasunon niyang mga tahas sa amateur boxing.

“Napili ko ang MP Promotions dahil sa kanilang 100% support sa aking hangarin na lumaban pa para sa Pilipinas sa mga future SEA Games at Asian Games competitions at maging sa Olympics,” matod ni Marcial sa www.gmanews.tv.

“Sa katunayan, nakasaad sa aking six-year-promotional deal na hindi sila magiging hadlang sa oras na kailanganin ako ng national team.”

Niadtong Abril, si Association of Boxing Alliances of the Philippines (ABAP) president Ricky Vargas nipadayag sa iyang kabalaka human sa daghang tanyag nga nadawat ni Marcial gikan sa professional rank.

Alang kang Vargas, si Marcial adunay dakong poruhan nga mahimong labing unang atleta nga makahatag sa Pilipinas og labing unang gold medal niini sa Olympics.

Gipasalig ni Marcial nga dili niya talikdan ang iyang ambisyon sa Tokyo Olympics.

Nagpasalamat si Vargas nga ang MP Promotions maoy napili ni Marcial.

Gipasalig ni Marcial nga buhaton niya ang tanan aron makahatag og dakong dungog sa Pilipinas sa professional ug amater boxing.

“Gaya po ng aking naipangako, ibibigay ko ang lahat ng aking makakaya para makuha ang minimithi natin na Olympic gold medal at maging isang boxing world champion ilang taon mula ngayon,” batbat ni Marcial. (ESL)