NAHUGNO ko sa pagpahibalo nga napakyas ang ABS-CBN sa gihangyo niining bag-ong prangkisa gikan sa Kongreso, taga media sab god ta (print lang mi ug broadcast sila).
Nakahigala na sab tag taga ABS-CBN ug ang dakong plato alang sa telebisyon sa luyo sa balay iya sa Sky Direct nga na-tsugi sab.
Mao na nga usa ko sa nanghinaut nga makabalik gyud ang ABS-CBN.
Mga higala nga nakakita nako nga ni-posing uban sa mga artistang Kapuso lakip ang mga magsisibya nga sila si Super Bobby Nalzaro, Cecile Quibod-Castro ug uban pa.
Sa mga nangutana kon nagbudhi na ba ko sa GMA 7, akong gitubag nga isip kauban media, wa tay pinalabi ug kon nahitabo pang GMA 7 ang naa sa maong kahimtang, molaban gihapon ko.
Daghan sab god tag higala diha. Anà lang!
***
Taliwala sa mga kahadlok ug kahingawa sa mga panghitabo tungod sa pandemya, ang Pilipinas napili nga maapil sa Philippine soundtrack sa Korean nobela nga “Misty” sa GMA 7 primetime block.
Ang nailhan nga Queen of Asianovela Soundtracks, Faith Cuneta nibalik sa eksena human sa duha ka tuig nga pag-atiman sa pamilya.
Gi-record niya ang “It Must Have Been Love” nga orihinal sa Roxette ug apil sa pelikulang ‘Pretty Woman’ diin si Julia Roberts ug Richard Gere ang mga bida.
Ang istilo ni Faith nibagay sa istorya ni Kim, usa ka news anchor, nga gipasanginlang nipatay sa iyang kanhi uyab ug gilabanan sa iyang kanhing bana. Pagkakomplikado.
Ang Curve Entertainment ang nag-release sa “It Must Have Been Love” ni Faith nga naa na sa tanang digital platforms. Ang social accounts ni Faith mao ang @FaithCunetaLive sa FB, @faithcuneta sa IG ug @FaithCunetaLive sa Twitter.
Gimingaw na si Faith pagkanta ug naglaum nga makahimog concert kon mahapsay na ang kalibutan.
***
Gipakita sa 24 Oras sa GMA 7 ang paghatag og mga protective supplies sa Kapuso Foundation ngadto sa Oslob District Hospital.
Nakuha ni Allan Lauron, all-around utility worker ug usa sa mga recipients, ang gitawag nga five minutes of fame dihang siya maoy na-feature sa balita.
Mga pahalipay ug ipadayon ang maayong pagserbisyo, Lan!
***
Sa di madugay mobalik na ang mga kalihukan sa turismo lakip na ang whaleshark watching sa Oslob, canyoneering sa Alegria ug Badian, diving sa Moalboal ug uban pang dapit sa Cebu.
Makigtambayayong ta pinaagi sa pagtuman sa health protocol!