SUPERBALITA CEBU

Rabacal: Mananakop angay mag-seminar

Pakabana

KINAHANGLANG ayuhon og briefing ang mga mananakop, pulis ug sundawo- nga idestino aron pagbantay sa mga tawo nga dili motuman sa mga protocol sa gobiyerno. Daghang mga reklamo nga ang mga pulis dili magkadimao sa pagsita sa mga tawo.

Bisan frontliners sa ospital gidakop tungod kay namalit og pagkaon kay walay gipakita nga quarantine pass. Apan diha siyay ID nga nagpamatuod nga siya nagtrabaho isip usa ka nurse sa ospital. Diha usay mga gihatagan sa bag-ong QR pass nga gi-imbargo sa checkpoint tungod kay dili kuno sinaw sama sa uban. Gi-angkon ra sa Cebu City hall nga genuine ang maong pass apan human na mahasol ug ma-uwaw ang nagdala sa maong pass. Usa ka reporter ang gidakop kay walay quarantine pass bisan kon ang usa ka sakop sa media giila nga APOR kun authorized persons outside residence. Karong bag-o, usa ka 15 anyos ang gidakpan tungod kay miguwa sa ilang balay.Gisilutan siya sa pag push-up. Nakuyapan ang maong bata.

Uyon ako nga silotan kining mga malapason nga mangisug kon sitahon sa mananakop. Importante kaayo ang pagsul-ob og face mask ingon man ang social distancing aron mominus kining pagpanakud sa Covid-19. Hinaut pang ayuhon lang unta pagtratar ang makalapas sa mga lagda ug reglamento sa atong pagpakigbatok sa Covid-19.

* * *

Hinaut pang mahapsay na ang pagpadagan sa Cebu City hall niining mosunod nga mga adlaw. Niadto gud nga nangagi mura man og nagkayamukat lang ang panghitabo. Dili na lang kita maghisgut niadtong uban apan kining gidudahan nga tuob kits nga gipanghatag ngadto sa mga isolation center dinhi sa dakbayan. Nagduda ang katawhan nga adunay cover-up nga nahitabo. Sa dihang gibalita nga adunay usa ka libo ka tuob kits nga gipalit og P2.5 million. Sa dihang nabasa ni Mayor Edgardo Labella sa kulom ni Atty. Frank Malilong ang kabahin sa tuob, iyang gihimakak nga mitugot siya sa pagpalit niini. Iya gani nga gisaad nga dili niya bayran ang P2.5 million nga balor sa tuob kits.

Sunod sa pahayag sa mayor mipahibawo dayon ang iyang tigpamaba nga wala palita ang mga tuob kit kay gidonar kini sa usa ka tawo nga wa magpa-ila. Apan dihay papeles ang BAC, apan wa mahinayon ang bidding kay diha may mihatag niini. Nahibong ang katawhan nganong wa man masayud ang mayor nga anaa diay usa ka libo ka tuob kits nga gihatag. Duna bay mga papeles kalabut niining pagdawat sa maong donasyon ug si kinsa may nagdawat? Nahinumdum man hinuon ako niadtong gidonar nga linibong manok. Dili mapugngan kining pagduda sa ubang mga tawo nga gi-utang kini ug bayran lang kon mahapsay na ang mga papeles kalabut niini. Apan karon, nagtuo sila nga matabla ang supplier niining tuob kits. Anyway, naa pa kunoy daghang proyekto ang Cebu City diin siya makabawi sa iyang P2.5 million nga nahug sa linaw ug natunaw. (mannyrabacal1144@gmail.com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph