GIPA-UBOS na ngadto sa modified enhanced community quarantine (MECQ) ang Dakbayan sa Sugbo sa Inter-Agency Task Force for the Management of Emerging Infectious Disease (IATF). Molanat kini og 15 ka adlaw, gikan Hulyo 16 hangtod sa Hulyo 31. Unsa man ang kalainan sa ECQ ug MECQ? Kon atong huna-hunaon way dakong kalainan ang ECQ ug MECQ. Matod pa sa mga bugoy nga ang MECQ ‘morag ECQ’ ra gihapon. O ‘manghod sa ECQ. ‘
ang kalainan nga morag relax lang gamay ang MECQ sa ubang mga kompaniya diin tugutan na nga maka-operate apan 50 per cent sa ilang work force. Sirado gihapon ang shopping malls, restaurants ug bars. Dili gihapon tugutan nga maka-operate ang entertainments ug leisure centers. Wala gihapoy public transportation sama sa public utility jeepneys o taxi nga tugtang makabiyahe.
Buot ipasabot nga dili gihapon makabukas ang mga patigayon ug daghan gihapon nga commercial establishments ang di maka-operate ug daghan gihapon ang di makabalik sa ilang trabaho. Patay gihapon ang ekonomiya. Ambot kon masustinihan ba sa kagamhanan ang panginahanglan sa katawhan labi pa kadtong mga nawad-an og panginabuhian?
Ang desisyon sa Task Force nga ipaubos ang Cebu City sa MECQ nunot gihapon sa nagkasaka mga mga kaso sa Covid 19. Bisan pa sa pag-take over ni Secretary Roy Cimatu isip Covid overseer, apan nagpadayon gihapon ang pagsaka sa mga kaso. Unsa man kaha ang hinungdan ug rason nga wala man gihapon mobahar ang mga positive cases? Kaniadtong wala pa si Cimatu, si Cebu City Mayor Edgardo Labella ang atong gibasol kay huyang ang liderato. Karon, si Cimatu na usab ang atong basulon?
Asa man ang problema? Nganong nagpadayon man ang pagsaka bisan sa hugot nga polisiya nga gisagop sa atong mga namunoan? Gumikan ba kay daghang mga masupakon? Gumikan sa kagahi sa atong ulo? Ato hinumduman nga bisan milugak na gamay ang atong quarantine status, anaa gihapon nagpabilin ang virus ug sigurado gihapon nga mokatap kini kon dili kita magmatngon ug mosunod sa mga health protocol.
(bobbygnalzaro@gmail.com)