GRABE ang giagian nga mga isyu sa administrasyon ni Cebu City Mayor Edgardo Labella. Gikan sa response niini batok sa coronavirus disease, ngadto sa quarantine pass, tuob kits ug karon sementeryo.
Gihulagway nga nagkaguliyang ug haguka ang iyang administrasyon kay gikinahanglan pang moanhi ang nasudnong kagamhanan aron siya abagan. Naisyu ang tuob kits nga paliton unta, apan nahimong donasyon human ang mayor niingon nga wa siya masayod, way pagtugot gikan kaniya busa di niya pabayran. Human gidonar, giisyu gihapon.
Wa tugti sa Department of Environment and Natural Resources (DENR) ang paggamit sa luna sa Siyudad sa Barangay Guba kay nahisakop kini sa watershed area. Apan ang dako sang pangutana, naa may sementeryo sa mao nga dapit, nganong nakalusot man na? Nagpiyong ang DENR niadtong panahuna o nahadlok sila sa tawo nga nagpabutang sa sementeryo?
Sayon ra lubugon ang mga lakang sa administrasyon ni Labella karon. Sagad sa mga kritiko iyang mga kaatbang sa pulitika ug kadtong nagpakaaron ingnong kaalyado, apan kaatbang diay. Wa ra bay gihimong tabang, kon di nanghinan-aw lang. Kutob ra sa pagpanaway, way alternatibong lakang nga gipresentar o moabag man lang.
Klaro nga sa pagsugod pa lang sa quarantine, ang administrasyong Labella kuwang og suporta gikan sa mga barangay kapitan. Apan karon nga nangisog na ang Department of the Interior and Local Government (DILG), wa nay lusot ang mga kapitan sa pagpatuman sa mga health protocol sa ilang mga tugkaran.
Apan gikinahanglan usab nga husayon usab ni Labella ang iyang mga tawo. Way lakang nga pagahimuon nga di siya masayod. Gikinahanglan ang pagplano sa tanan ug estriktong subayon. Gikinahanglan usab nga usa ray motingog aron di magsibag ang mga tubag. Kon dunay mosalida, siya ra.