LOLO nga number 2 sa most wanted list sa kapulisan sa Dakbayan sa Toledo nasikop sa Huwebes sa alas 6 sa buntag sa Barangay Pangamihan sa mao nga dakbayan.
Si Pedro (tinuod ngan gipugngan), 67, mag-uuma, dunay kapuyo, nakugang dihang naabot ang kapulisan sayo sa buntag aron pagdakop kaniya.
Si Police Staff Sergeant Alexander Consul sa Toledo Police Station nga nahinabi sa Superbalita Cebu, nagkanayon nga si Pedro number 2 most wanted sa ilang dakbayan.
Nag-atubang kini og kasong rape in relation sa Republic Act (RA) 7610 kun Anti-Child Abuse Law hinungdan nga gilutsan siya og warrant of arrest nga giluwatan ni Judge Ruben Altubar sa Branch 29 sa Regional Trial Court sa Dakbayan sa Toledo nga gipitsahan Marso 30, 2015.
Walay piyansa nga gitugot ang korte. Matod pa ni Consul nga si Pedro nihimakak nga iyang gilugos ang iyang menor de edad nga humagbos sanglit ilang sinabutan ang ilang relasyon. Ang iyang gibuhat ngadto sa anak sa iyang kapuyo nagbunga og usa ka anak. (GPL)